10:45 م

بحبك عشان انتى انتى !!!

بواسطه ســـهــــر



الجو بقا برد وانتى وانا لسة مشربناش قهوتنا فى الكافية بتاعنا من سنين
الشتا جة وانتى وانا لسة مأجلين مشاوير من 5 و 6 سنين
من يومين نزلت وسط البلد من غيرك
القهوة كانت عبقرية بس انتى كنتى حاجة فوق مستوى جودة القهوة تخيلى !!
لسعه البرد اللى حسيتها بعد الساعه 12 اول مفتكرت جملتلك اللى دايما تقوليهالى
حسيت بالدفا وكانت فى ابتسامة بلهاااااء على وشى
حبيبتى انتى كائن مع الوقت هيتلاشى
عاوزة اجرى انا وانتى على الكوبرى تانى ونغنى اغنية سميرة سعيد
عاوزة نرجع نشرب كابتشينو مالوش ريحة الطعم ويعجبنا
عاوزة نسافر مع بعض بالليل ونرجع واحنا خايفيين ومقتولين من الضحك
عاوزاكى تقوليلى حاجات قوليتهالى قبل كدة مليون مرة
واحرجك واقولك كرهت حواديتك
وتضحكى وانتى عارفة انى عمرى ممليت منك ولا عمرى همل منك
ولا هعرف فى يوم اضحك من قلبى غير معاكى
انا مرة اتمنيت انك تكونى مش حقيقية
يعنى اتمنيت ان انتى تكونى حاجة خرافية كدة مش بتحصل غير مرة واحدة فى العمر
وبتحصل لشخصية واحدة بس بردوا
واجى احكيها للناس ومتصدقنيش واتجنن انا بقا
نفسى اسافر عبر الزمن واشوف شكل علاقتى بيكى بعد سنييييين
هتبقا عاملة ازاى هنفضل صحاب اوى كدة ؟
ولا الدنيا هتاخدنا
بس افتكرت كلامك لما قولتيلى انا واثقة اننا لما نكبر اوى ولو عشنا مع بعض
هنوصل لحالة من الخرس يعنى مش هيبقا فى حاجة تتقال لاننا قولنا كل حاجة
ونسيت اقولك على فكرة معجبنيش الاحتمال دة خالص
انا عاوزة اشوفك لما تكبرى يا بنتى هتبقى شبة مين كدة ؟
شبه البت اللى حبيتها من سنين وبحب تفاصيلها
ولا هتبقى حد تانى هستغربة بس الآكيد هكون بحبة
من الاخر كدة انا بحبك اكتر مبحب الشتا والبرد
بحبك اكتر من القهوة المظبوطة الساعه 7 الصبح
بحبك اد السنين اللى فاتو واللى هييجو
بحبك زى منتى وبحب كل الجوابات اللى كتبتيهالى واللى لسة مكتبتيهاش
واللى ناوية تكتبيها واللى مش ناوية تكتبيها
بحبك أكتر من كل التواريخ اللى مدوننها فى كشاكيلنا
بحبك بطول وعرض كوبرى قصر النيل :)
بحبك أكتر من المشاوير اللى بيوصلها السوبر جيت :)
بحبك أكتر مبحب البخور اللى بالتفاح والفل والصندل
بحبك



5:12 ص

الدنيا بترقص بيا

بواسطه ســـهــــر




حاسه ان الدنيا بترقص بيا

كل اللى مكتوب كلام مالوش علاقة ببعضة ومفيش اى حد مجبر نهاااااااائى
انة يقول ربنا يشفيكى او يتصعب على الحاله الروماتيزمية العقلية دى
لان دى مدونتــــــــــــــــــــى وكلللللللللللللللللللللل مدون من حقة يقول اللى هو عاوزة


لا ومش كدة وبس لالالا البوست جدا طويل ومش هيفيد اى حد

ممكن تقروة وتدعو ربنا عمركم متوصلو لدى حاله
حاله من الاكتئاب كفيلة انها تخلينى أخد شريط كامل من البنادول فى نص ساعه من كتر الصداع

ساعات أحب حاجات ميحبهاش غيرى
بس كان نفسى يقاسمنى ولو حاجة بسيطة لانى كائن بتأثر فيه جدا التفاصيل
مقدرش يحب ولا حاجة من اللى بحبها عشان كدة مقدرتش افتكرله موقف واحد اتشاركنا فيه

بقا حبى ليك حاجة تكسف بكدب وربنا يسامحنى

المهزلة الحقيقة انك تعرف تفاصيل حكايتك من الناس
وتتبع خطوط القهر النفسى من على شفايف كل اللى حواليك
ساعتها بس بتبقا كل العلاقة تحت بند حاجة تكسف وتوكس

صعب اعيش فى الدنيا ديا الا بيك

كنت بحب اصطبح بالآغنية دى وانا معاك
بس كنت دايما تزعل منى لما اقولك انى مأقلمه نفسى على الحياه لو سبنا بعض
مش قولتلك عمرك مفهمتنى
كنت عاوزنى اموت من بعدك ؟ مفيش حاجة بتفضل للأبد

وفينك أنا من غيرك أنا مش عاقل ولا مجنون
انا مطحوووووووووون والدنيا دى رحايا

برغم ان صورتك يابابا جمبى ألا أنى بتلاشى أنى ابصلك
لحد النهاردة مش قادره استوعب فكرة انك خلاص فارقت الدنيا
ومش هشوفك ولا نتخانق تانى ولما تعرف انى زعلانة اوى
تيجى تصالحنى وبكل حب تبوس ايديا وانا أعيط واقولك اسفه

مبحبش حد يشوف اى دموع فى عينيا علشان لا اصعب عليه ولا يزعل عليا

انا بحبك انتى بس تشوفينى وانا بعيط عارفة لية عشان بخاف تفتكرى انى شايلة اوى جوايا
وتبتدى تقلقى لدرجة انك تهملى ولادك وبيتك وتبتدىء حالات الاكتئاب الغير المتكافىء عشانى
بعيط قدامك عشان انا واثقه انك عارفة انى خلاص طالما عيطت يبقا انا كدة قررت انسف اى حد
خلقة ربنا وصلنى لمرحلة الحزن دى وقتها بتطمنى
بس الكلام دة فاكرة اخر مرة حصل امتا ؟
كان من حوالى 4 سنين تفتكرى بقا فى حد على وجة الارض يستاهل انى اخسرك عشانة
no way

أنا شارب سجارة بنى حاسس ان دماغى بتاكلنى

بداية المعركة بينى وبين أمى أول حاجة بتخطر على بالها
أنى مدمنة وبتضطر تتكلم من الجيران والأهل والحبايب وطنط عايدة فى الكويت :)
وبعد المحاولات الميؤس منها بيبتدى الصريخ والعويل
والبت اللى فضلالى ضـــــــــــــــــاعت

أن راح منك يا عين هيروح من قلبى فين ؟ دة القلب يحب مرة ميحبش مرتين

اول مرة كنت ازعل من الفنانة شادية بعد سماعى للأغنية دى
عشان اللى يحب مرة يحب تعستماشر مرة

بكره تشوف يا ناكر خيرى زمنى من زمن غيرى

افتكر انك شفت لحد معنيك جالها حول وانا ببقا فرحانة اوى
كل محس ان حد مختلف مش هتعوضة تانى
بس بزعل انك متعكنن وطالع عين اهلك ومش طايق نفسك وكاره حياتك ودنيتك
وبقول أحسن يستاهل يكش يولع ...

بنلف نلف نلف نلف والسنين بتلف تلف تلف

والآم بتزيد وجراح بتخف

كل حاجة ممكن تنتهى ألا قلقى عليك

كل مفتكر انك بتحتضر الآلام بتزيد

وكل مبتبقا جمبى الجراح فعلا بتخف

الف ليلة وليله قصه كل ليله

أحكى يا شهرزاد احكى لشهريار اشغليله ليله لطلوع النهار

فاكره الاغنية دى ؟ لما كنا بنسمعها يوميا ايام التدريب

فاكره ؟؟؟ فاكره لما مكنش معانا فلوس عشان ندخل نتفرج ع الشو

وتانى يوم جاتلنا دعوه ودخلنا اتفرجنا ومن كتر التناكة اللى كنا حاسين بيها مكلمناش بعض

فاكره الف ليله وليله بالليل كانت بتبقا عامله ازاى ؟


نهيتك منتهيتك والطبع فيك غالب وديل الكلب عمره ميتعدل ولو علقو فيه قالب

انتى عبيطة عشان فاكره انى عبيطة وياما حاولت اوصلك اوعى تستخفى بعقل حد
وياما اديتك فرصه تبقى بنى ادمة وتبطلى شغل العيال دة
أنا لحد النهاردة مقولتلكيش انى مقهورة منك لحد النهاردة مقولتلكيش انك جرحتينى اوى
فى الوقت اللى كنت حطاكى فية جوة عينيا وشيلاكى على راسى
للأسف يا عزيزتى مبقاش عندى قدرة انى اسامح ولا عندى وقت انى اشرح
لان ببساطة أعتبرت كل حاجة حصلتلى مرحلة وعدت وريمت عليها جاز وولعت فيها جوايا
جواااااااااااااايا عشان مرجعلهاش تانى


ملحوظة مش مهمة لآى حد
مبوصلش للمرحلة دى غير لما فعلا أكون مكتئبة وكارهه كل حاجة
وللأسف الشديد أنا الآيام دى فى أشد مراحل الآكتئاب اللى مرت عليا

7:29 ص

مـشــروع حــيــاتى

بواسطه ســـهــــر






صــبــاح الــخـــيـر
ازيكم كلكم وحشتونى بجد

وملحوظة كمان البوست طووووووووووويل شوية

اللى زهقان او مخنوق او أرفان من حاجة مهما كانت

اية هى الحاجة دى ميقراش البوست حفاظا هلى هدوءة

أنا عاوزة افتح كافيه بحق وحقيقى وفى لية اكتر من اسم فى دماغى

فيروز كافية أو جاره القمر أو بعدك على بالى

طيب ما علينا مش هختلف ع الاسم دلوقتى الاسم سهل

عايزاة فى مكان هادى جدا وزباين الكافية مش هيبقو أى زباين لالالا
مستحيييييييييييييل وبعدين اللى هيدخل الكافيه بتاعى دة هيبقا المشروب الاساسى فيه


الـــــــــــــــقــــــــــــهـــــــــــوه

عايزة الكافيه الديكور من جوة يبقا رقيق وبسيط

وهيبقا فى كل استيشن لون مختلف

ولون الكافيه هيبقا كله بنفسج


بأختلاف درجاتة وعلى كل طاولة فازة صغيره جدا فيها وردة بنفسج

والكراسى هتبقا قطيفة لونها غامق عشان تدى احساس بالدفا

عاوزة أجيب باند فى الكافيه كلاسيكى جدا

اجيب مطربه تغنى اغانى قديمة بلحن هادى جدا

ودة لانى هجيب بيانو أسود كبير فى وسط الكافيه

وعاوزة واحد كبير بشعر أبيض يعزف عليه




وهجيب عازف كمان

هحط صورة كبييييييييييييييييرة لفيروز فى اول الكافيه

وجمبها هيكل عربية صغنن كدة لونة ازرق

عربيتها اللى عطلت منها فى ميس الريم :)



وانا اللى هشرف على الكافيه وانا اللى هفتحه كل يوم الصبح

وانا رايحه الكافيه هشترى الجرايد اقراها مبحبش اقرأ الجرايد ع النت

بحس ان مالهاش طعم



وهعمل مكتبة فى الكافية بسيطة ومش كبيرة

هحط فيها كل روايات أحلام مستغانمى ودواوين نزار وجويده

وهجمع كل مقالات شهرزاد واعملهم فى مجلد

هجيب بخور بريحه الصندل والفل والتفاح بيبقا الجو عبقرى بالبخور وريحه البن

واكيد هخلى مكان مخصص للى بيدخنوا بس ممنوع الشيشه

مش لآنى بكرها لا بس لآن جو الكافيه مينفعش فيه شيشه

انا كمان نسيت اقولكم انى هشغل فى الكافيه اغانى فيروز دة الاساسى


وفى اوقات طبعا هريح الست فيروز شوية

وهشغل منير و وجيه عزيز

وطبعا كلة على الجرامافون







دة حلم حياتى على فكرة أمنيه حياتى يتحقق ولو بعد عمر
المهم انة يتحقق

فكرت كتير جدا اعمل دة ازاى لاقيته عاوز فلوس كتيييييييييييييييييييييييييييييرة جدا

وطبعا صعب ويكاد يكون مستحيل

المهم انى دونت الكلام دة عشان يوم من الايام بأذن الله

لما فتح الكافيه أبقا أخد برنت من الكلام دة

وأحطة جمب صورة فيروز :)

وصباحكم فيروزى

2:48 ص

مـــن يــســتـــحق !!!

بواسطه ســـهــــر




فى المساحه الآكثر عمقا فى القلب

هناك دائما مملكة لشخص واحد
ولآن قصص الحب تتشابة حد التطابق فى البدايات

الآ أن النهايات كبصمة اليد

لا تتكرر

برغم ان المواقف تتكرر الآ أن ردود الآفعال لا تتكرر

فثمه أشخاص يحتلون المملكة المنعزلة بجدارة

ومهما حاولنا جاهدين على ان نلوث تلك البصمات الجميلة

تقف امامنا افعالهم وتصرفاتهم كالمرصاد

أذن فهم يستحقون مساحه من قلوبنا وعقولنا وذكرياتنا

فلماذا نستمر فى محو الأشياء الآكثر طهرا ونقاءا بيد
ترتعش وبعقل غائب وبقلب بارد ؟
وثمه أشخاص يحتلون المملكة المنعزلة بمنتهى الوقاحه

برغم ان جميعا متفقين على ان تلك المساحه لا دخل لنا

بأصحابها

الآ أن تلك الشخصيات الوقحة الواقفة فى مساحتنا

الخضراء يجعلونا أكثر همجية وأكثر عصبية

وأكثر توترا فقط لكونهم فى جزء من قلوبنا رغما عنا
نعم فهناك من يسكن قلوبنا وفى يداة صندوق يحتوى

على مئات الطعنات والأهات
فكلما رأيت وجة جميل هادىء ونقاء طاغى

ايقنت ان من يسكن المملكة التى لا تسع سوى شخص واحد

شخص نقى بتصرفاته ونهاياته المرئية
ولم ينتهى من حاضر تلك الوجة النقى

وكلما رأيت وجة أخر بتصرفات غير مرتبة

أشفقت علية من ساكن مملكتة

فجميع تصرفاتنا وردود أفعالنا

تترتب بناءا على من يحتوينا سواء بموافقتنا

أو رغما عنا

فليبحث كل منكم على داخلة ولينظر الى وجهه فى لحظة صفا

وحدة سيعلم أن كان ساكن مملكتة يستحقها أم لا




11:00 م

حـــدش شـــاف عــقــلــى ؟؟؟

بواسطه ســـهــــر








سالخير عليكم كلكم

من غير مقدمات لا هتودى ولا تجيب

يا جماعه انا حاسة ان كل حاجة ضدى طب بلاش كدة

حد حس فى يوم من الايام ان أيامة بتتكرر ؟

هتقوليلى من قاعده الخزانة واللى قعداها هقولكم لا ابدا



طب اية رأيكم انى حاسة ان فى حد بيرتب مؤامرة ضدى ؟

ودة مش احساس جوايا لا دة يقين لدرجة انى بقيت اراقب كل الناس اللى حواليا بداية من ماما لحد بنت اختى اللى عندها سنة وشهرين



وكمان بقيت اشك فى ككككككككل الناس أختى وصحباتى

وما اجراكم ما اختى دى بتصهين تصهين وتطلع بمصيبة معتبرة

وحاسة ان مونتى مبتحبنيش زى من 6 سنين فاتوا
وان سمر مضطهدا كل احاسيسى
وحاسة ان مروة بتشتغل من ورايا



طب بلاش لا كدة ولا كدة تقولوا اية انى بحلم الحلم وبيتحقق ايوا الله بيتحقق

مع العلم انى بتغطا كويس جدا وبنام بالشراب كمان



طب انا بقا صحيت من كم يوم وكنت حلمت ان فى البيت عندنا بيتخانقوا كلهم مع بعض

المهم صحيت لاقيت فى وشى خربوش والله العظيم وبهدلتهم كلهم قولتلهم لما تتنيلوا تتخانقوا اتخانقوا بعيد عنى



بعدها بمفيش لاقيت اختى وماما بيتكلموا عليا ؟

اة اختى بتقولها انا حاسة ان البت دى ملبوسة

وترد عليها ماما تقولها لا سيبك من الكلام دة مفيش حاجة من دى



دى اكيد معمولها عملللللللللللللل

المهم قولت اخد البت اختى على جمب ونعمل اجتماع فوق مستوى الشبهات

وعملنا فنجانين قهوه وقولت اخد وادى معاها فى الكلام



وحكيتلها كل دة واكتر وقولتلها ان اللى بيحصل بيتكرر

وحلفتها بالله تاخد كلامى على محمل الجد قالتلى شوية كلام معجبنيش

عشان قاعده مبشتغلش وهو انا يختى كنت نازلة من بطن امى على مكتب ؟

منا طول عمرى عاطلة جت ع الكم شهر اللى اشتغلتهم



تقولى عشان مفيش فى حياتك حد تحبية ويحبك

قولتلها شووووووفتى محدش بيحبنى اهو اديكى اعترفتى



انا حاسة انى زهقت م اللى بيحصل دة وبجد دة مش نوع من انواع التهريج

لا دة بجد ومن غير اسباب مقنعه ما هو يا اما اعرف كل دة لية يا اما هأرفكم معايا

وانا فى الغتاتة مجبتنيش ولادة ومبملش ولا بزهق



شوفولى حل او سبب مقنع

ولحد هنا اغمن على الكلام بس لسة ممتش





تتمسوا بالخير

6:50 ص

صباح بطعم الحنين

بواسطه ســـهــــر






صباح بطعم الحنين

صباح كل الطرق المؤدية اليك

صباح حب العمر

صباح الألحان الصامتة فى الزحام
صباح بلغه التساؤل


أين أنا منك ؟

وأين أنت منى ؟!

صباح الحنين سيدى

صباح شديد العبث بى

صباح شديد القسوة الحانية سيدى
صباح شديد الآلم الفّرح سيدى

صباح أخذنى منى

أفتقدك حد الآلم

أفتقدك حد الوجع

صباح السذاجة سيدى

صباح المسافات القريبة

والطرق المستحيلة

صباح الآسرار الملموسة

صباح الحيرة

صباح لقاءنا كالآغراب
صباح لم نجرء على القاءة
صباح التمنى فقط سيدى

صباح التخيل فقط سيدى

صباح حنينى لك

صباح المعاناة وحدة يعلم بتوابعها الله

هذا هو صباحى

فكيف هو صباحك













6:42 م

أنا سبت الشغل :)

بواسطه ســـهــــر




أنا سبت الشغل يا بلوجرية


وطبعا الشغل افتقدنى ومحتاسين من غيرى :)

ووزارة القوة العاملة ساقت عليا طوب الآرض
وأنا على صرخه واحدة مرجعلوش مرجعلوش

والله العظيم مش زعلانة ولا ندمانة أنا كان فضلى شوية وابقا شبة الناس

اللى كنت بأرف حتى ارمى عليهم السلام

الناس هناك بشعه اوى بيتكلمو على بعض وكلام مؤرف وزباله
بيدو زووووونب فى بعض وبعدها ياكلو ويشربو مع بعض

صحابى كتير من اللى اشتغلو قبلى قالولى دة عادى وموجود فى كل مكان

لكن انا أرفت اية اللى يجبرنى اتعامل مع ناس زى دى ؟

لا أنا عندى عيال بجرى عليهم ولا هموت من غير الشغل

يبقا بلاها وجع قلب وقله قيمة

اة دى قلة قيمة لما تضطر تتعامل مع ناس من جواك أرفان أوى منهم
دى واحدة يا ناس قاعده بتتكلم على زميلة ليها سابت الشغل من فترة

وقالت فيها اللى مفيش يهودى ممكن يقولة

واخر المتمة قالت
كرييييييييييييييه عينى اللى يخوض فى اعراض الناس

نيهاهاهاهاهاها

على اعتبار انى كائن شفاف لا بيشوف ولا بيسمع ولا كنت موجودة وهى عمالة تقسم مثلا

حاجة أخر مسخره بجد

انا متعرفتش ولا صاحبت هناك فى الشغل غير بنت واحدة

حبيتها اوى ولما مشينا مشينا مع بعض مع حزب احنا لا

بس لان احنا كنا فعلا تعبنا من المعاملة المؤرفة اللى محدش كان بيتعاملها

غيرى انا وهى وياما صهينا
بس وصلنا لمرحلة ان معدش ينفع نستنا
اة وجودنا كان حارق دم ناس كتير اوى بس مش عشان احرق فى دمهم بوجودى

انى انساق للمستوى دة

قبل ممشى خدت كل حاجة تخصنى

فلاشتى حبيبتى والاندكس بتاعتى والقلم ابو جنية ونص

والقلم الرصاص ابو سنون والاستيكة

والسبرتاية والكنكة والولاعه وعلبة الكبريت الاحتياطى

ونسيت مجى :((

ياترا بيعملو فيه اية دلوقتى ؟

تلاقية هريينة شرب بيشربو فية سخن على ساقع

لحد مجالة حمه

وبعدين مش بيغسلوة اكيد دى العيال اللى هناك معفنة اوى
تلاقى ولا نقطة بريل شمها حتى
بس هجييييييييييييبة قبل مجيب مرتبى كمان امال ايه

انا سبت الشغل وبكررها مش زعلانة وبحمد ربنا انى طلعت منة بحاجة


طلعت منة بصحبتى اللى بحبها اوى
وربنا اكيد هيعوضنا خير ويرزقنا بشغل احسن منة
مع ناس أحسن







وبس خلاص

8:44 م

صدفه أعات اليها الحياه

بواسطه ســـهــــر





تستيقظ فى السادسه والنصف ويستيقظ معها قطها اللطيف

تطبع قبله على رأسه وتذهب لطقوسها اليومية المعتاده

أخذت حمام دافىء وأدت صلاه الصبح

وذهبت لتعد فنجان قهوتها المعتاد

تريده اليوم على قدر عالى من الاتقان وها هو أذن

على صوت فيروز تستمتع بقهوتها فهى الان تدندن

كنا نتلاقا من عيشه نقعد على الجسر العتيق


ما أروع صباحك يافيروز فى بداية يوم فى فصل الشتاء


كالعاده وقفت حائرة امام خزانة ملابسها

ماذا ترتدى اليوم ؟


فقررت ان ترتدى الآسود الذى يطفى عليها الوقار ويذيدها سنا على سنها

فلم تتردد فى ارتدائة ووضع لمسات خفيفة جدا من الميكاب


تبتسم لرؤيتها رساله من صديقتها تقول فيها جملة تكررت لمئات المرات



saba7 elfol ya loza hnnzel emta ?


تهرول لتعد الطعام لقطها الحبيب وتقبل والدتها وتندفع نجو الباب


تقابها صديتها بأبتسامة وتسألها فى زعر


كنتى بتعيطى يا لوزة ؟


فتهز رأسها بالنفى وتقول لا انه الهواء البارد لا شىء أخر

يجعل عينى تدمع


وفى السيارة التى تنقلها الى العمل لمحت سيارة أخرى بها شخص كانت

فى يوم من الايام تعرفه وتحفظة عن ظهر قلب


أنة هو حب عمرها وتجلس بجانبة أمرأة تتأكد انها زوجته


ما هذا ؟ ولماذا اليوم وفى هذا الوقت المبكر ؟


انه يقود سياره جديدة وبجانبة أمرأة جديدة

وبحياته طفلة تحمل اسمة

انها أفضل منها فهو على الآقل قادر على مسايره حياتة

برغم شكواة المستمرة لصديقتها المقربه عن قسوة الايام بدون حبيبتة السابقه


كل أقاويلة أدعاءات وأكاذيب و تصديقها نوع من الغباء


قادر هو على المضى فى الحياه بدونها فماذا تنتظر


فهمست لصديقتها


نعم بألامس كنت أبكى على شخص كنت أعرفة

على شخص كنت أشفق على حياته الحزينه

على عدم مقدرته على الحياه مع أمرأه أخرى غيرى


ولكن من اليوم أعدك أن لا أبكى مره أخرى

وسأمضى فى طريقى

وسأهتم دوما لآمرى أنا


وليذهب هو الى الجحيم


تقبلها صديقتها وينظر اليهم كل من فى السيارة

ويبتسم


ولآول مرة تشعر أنها تحررت

لمجرد صدفة فى نهار شديد البرودة


برودة الشتاء أفاقتها من أكذوبة عاشت العمر فى تفاصيلها وحيدة


شكرا للصدف التى تعيدنا الى ذاتنا بعد العبث بها أيام وسنين

12:05 ص

I'm BaCk

بواسطه ســـهــــر

السلام عليكم ورحمه الله وبركاته
رجعت تانى انا بعد غياب حوالى 9 شهور :(
وحشتوووووووووونى اوى اوى اوى
والله الغياب مكنش بأيدى خالص انا الدنيا اتلغبطت عندى شويتين بس طولوا أوى
لكن الحمد لله نقلنا لبيت جديد وعقبال عندكم كدة كلكم أشتغلت :">
والنت لسة واصلة بقا من فترة قصيرة خالص
فكرة اكتب بس قولت اتنسيت بقا وفجأة لاقيت أرق أنوسة فى الدنيا كلها
بتكلمنى وقولتلها خايفة اكتب وفى الاخر وعدتها انى انزل بوست جديد
عشان خاطر عيون أحلى ننوسة
يا جمــــــــــــــــاعه بجد فى حاجات كتير اوى اتغيرت كتير جدا
الشغل دة عالم تانى خالص خالص
ناس مختلفة ونفسيــــــــــــــات أجارك الله عليها
وناس طيبة وناس شريرة وناس تحبها وناس تتخنق لمجرد سماع صوتها
هههههههههههه
وكتير كتير
لدرجة ان طول فترة شغلى اللى مكملتش 5 شهور فكرت اسيب الشغل
حوالى 20 مرة لآن فى اكتر من وش لأنسان واحد بتقابلة فى اليوم
وفيه الانانى والطيب والشرير والساذج واللى عامل عبيط
أكيد هحكيلكم على التفاصيل دى كلها فى وقت تانى من غير غياب زى زمان
بس فعلا كنت محتاجة اقولكم وحشتونى يا ناس يا حلوة ياللى كانت مالية عليا دنيتى
بجد وحشتونى من قلبى