5:12 ص

الدنيا بترقص بيا

بواسطه ســـهــــر




حاسه ان الدنيا بترقص بيا

كل اللى مكتوب كلام مالوش علاقة ببعضة ومفيش اى حد مجبر نهاااااااائى
انة يقول ربنا يشفيكى او يتصعب على الحاله الروماتيزمية العقلية دى
لان دى مدونتــــــــــــــــــــى وكلللللللللللللللللللللل مدون من حقة يقول اللى هو عاوزة


لا ومش كدة وبس لالالا البوست جدا طويل ومش هيفيد اى حد

ممكن تقروة وتدعو ربنا عمركم متوصلو لدى حاله
حاله من الاكتئاب كفيلة انها تخلينى أخد شريط كامل من البنادول فى نص ساعه من كتر الصداع

ساعات أحب حاجات ميحبهاش غيرى
بس كان نفسى يقاسمنى ولو حاجة بسيطة لانى كائن بتأثر فيه جدا التفاصيل
مقدرش يحب ولا حاجة من اللى بحبها عشان كدة مقدرتش افتكرله موقف واحد اتشاركنا فيه

بقا حبى ليك حاجة تكسف بكدب وربنا يسامحنى

المهزلة الحقيقة انك تعرف تفاصيل حكايتك من الناس
وتتبع خطوط القهر النفسى من على شفايف كل اللى حواليك
ساعتها بس بتبقا كل العلاقة تحت بند حاجة تكسف وتوكس

صعب اعيش فى الدنيا ديا الا بيك

كنت بحب اصطبح بالآغنية دى وانا معاك
بس كنت دايما تزعل منى لما اقولك انى مأقلمه نفسى على الحياه لو سبنا بعض
مش قولتلك عمرك مفهمتنى
كنت عاوزنى اموت من بعدك ؟ مفيش حاجة بتفضل للأبد

وفينك أنا من غيرك أنا مش عاقل ولا مجنون
انا مطحوووووووووون والدنيا دى رحايا

برغم ان صورتك يابابا جمبى ألا أنى بتلاشى أنى ابصلك
لحد النهاردة مش قادره استوعب فكرة انك خلاص فارقت الدنيا
ومش هشوفك ولا نتخانق تانى ولما تعرف انى زعلانة اوى
تيجى تصالحنى وبكل حب تبوس ايديا وانا أعيط واقولك اسفه

مبحبش حد يشوف اى دموع فى عينيا علشان لا اصعب عليه ولا يزعل عليا

انا بحبك انتى بس تشوفينى وانا بعيط عارفة لية عشان بخاف تفتكرى انى شايلة اوى جوايا
وتبتدى تقلقى لدرجة انك تهملى ولادك وبيتك وتبتدىء حالات الاكتئاب الغير المتكافىء عشانى
بعيط قدامك عشان انا واثقه انك عارفة انى خلاص طالما عيطت يبقا انا كدة قررت انسف اى حد
خلقة ربنا وصلنى لمرحلة الحزن دى وقتها بتطمنى
بس الكلام دة فاكرة اخر مرة حصل امتا ؟
كان من حوالى 4 سنين تفتكرى بقا فى حد على وجة الارض يستاهل انى اخسرك عشانة
no way

أنا شارب سجارة بنى حاسس ان دماغى بتاكلنى

بداية المعركة بينى وبين أمى أول حاجة بتخطر على بالها
أنى مدمنة وبتضطر تتكلم من الجيران والأهل والحبايب وطنط عايدة فى الكويت :)
وبعد المحاولات الميؤس منها بيبتدى الصريخ والعويل
والبت اللى فضلالى ضـــــــــــــــــاعت

أن راح منك يا عين هيروح من قلبى فين ؟ دة القلب يحب مرة ميحبش مرتين

اول مرة كنت ازعل من الفنانة شادية بعد سماعى للأغنية دى
عشان اللى يحب مرة يحب تعستماشر مرة

بكره تشوف يا ناكر خيرى زمنى من زمن غيرى

افتكر انك شفت لحد معنيك جالها حول وانا ببقا فرحانة اوى
كل محس ان حد مختلف مش هتعوضة تانى
بس بزعل انك متعكنن وطالع عين اهلك ومش طايق نفسك وكاره حياتك ودنيتك
وبقول أحسن يستاهل يكش يولع ...

بنلف نلف نلف نلف والسنين بتلف تلف تلف

والآم بتزيد وجراح بتخف

كل حاجة ممكن تنتهى ألا قلقى عليك

كل مفتكر انك بتحتضر الآلام بتزيد

وكل مبتبقا جمبى الجراح فعلا بتخف

الف ليلة وليله قصه كل ليله

أحكى يا شهرزاد احكى لشهريار اشغليله ليله لطلوع النهار

فاكره الاغنية دى ؟ لما كنا بنسمعها يوميا ايام التدريب

فاكره ؟؟؟ فاكره لما مكنش معانا فلوس عشان ندخل نتفرج ع الشو

وتانى يوم جاتلنا دعوه ودخلنا اتفرجنا ومن كتر التناكة اللى كنا حاسين بيها مكلمناش بعض

فاكره الف ليله وليله بالليل كانت بتبقا عامله ازاى ؟


نهيتك منتهيتك والطبع فيك غالب وديل الكلب عمره ميتعدل ولو علقو فيه قالب

انتى عبيطة عشان فاكره انى عبيطة وياما حاولت اوصلك اوعى تستخفى بعقل حد
وياما اديتك فرصه تبقى بنى ادمة وتبطلى شغل العيال دة
أنا لحد النهاردة مقولتلكيش انى مقهورة منك لحد النهاردة مقولتلكيش انك جرحتينى اوى
فى الوقت اللى كنت حطاكى فية جوة عينيا وشيلاكى على راسى
للأسف يا عزيزتى مبقاش عندى قدرة انى اسامح ولا عندى وقت انى اشرح
لان ببساطة أعتبرت كل حاجة حصلتلى مرحلة وعدت وريمت عليها جاز وولعت فيها جوايا
جواااااااااااااايا عشان مرجعلهاش تانى


ملحوظة مش مهمة لآى حد
مبوصلش للمرحلة دى غير لما فعلا أكون مكتئبة وكارهه كل حاجة
وللأسف الشديد أنا الآيام دى فى أشد مراحل الآكتئاب اللى مرت عليا

70 شربوا معايا القهوه:

غير معرف يقول...

???????????????????

أم الخلود يقول...

تشكيلي أبكي لك ..

ومين سمعك الظاهر الموجه القادمة ليست موجة حر بقدر ما هية موجة اكتئاب والفضفضة تريح الواحد كتير لما ما يلاقيش حد يسمعه أو يفهمه.

طالبة مقهورة ..درجة أولى يقول...

سلامُ عليكم

ساسوووو..اوقات الشخابيط بيكون جواها كلام كتير..بس انتي مشخبطيش انتي فضفضتي..

انا متضايقة علشانك جدا..كنت بمر بحالة زي ديه من اسبوع بس لما شغلت نفسي بالمذاكرة والامتحانات بدأت انسى..

انتي محتاجة حاجتين..كوباية نسكافيه أو كابتشينو ومعاها شوكولاته حجم عائلي وفيروز ....هتلاقي كل حاجة بقت كويسة :) ان شاء الله

ربنا يفك كربك يارب ويسعدك ويهنيكي

ســـهــــر يقول...

أم الخلود

مش عارفة بس انا والله متمناش انها تكون موجه خالص صدقينى أحساس بشع

وميرسى ليكى يا قمر

ليله شتاء يقول...

السلام عليكم
بكل أسف داخلة على نفس المرحلة من الاكتئاب
ندعي لبعض بقى

ســـهــــر يقول...

طالبه مقهورة

طيب هتصدقينى ان قولتلك انى فعلا كنت بكتب البوست وانا بشرب كابتشينو بالفانيليا كمان :(

متضيقيش نفسك يا بنوتة انا الحمد لله
بعرف افوق نفسى فى الوقت المناسب من الاكتئاب أدعيلى انتى بسى :(

وربنا يوفقك وزاكرى كويس عشان نفرح بيكى يا توتة

نورتى الدنيا كلها

أحــوال الهـوي يقول...

طبعا اول سؤال عن الغيبه
قلت يمكن تكوني بتفتحي الكافية

طبعا بين السطور كلام كتيييييييييييييييير
لو حبيتي اطلع اللي انتي عايزة تقوليه ومخبياه

بس الطيب احسن

فيروز ملعلعه و مدونتك مفتوحه عندي طول الوقت و بتتكرر الاغاني

تحياتي

هوبتي يقول...

مش عارفه انا لمسني كل كلمة انتي كتباها يمكن لان انا عندي اكتئاب بشع بقاله شهور
طيب تعالي نحط اكتئابي علي اكتئاب ونخرج نروح اي حتي ؟؟
نكش نولع الدنيا من الاكتئاب ونعدي الاخرين بيه؟

محمود ناصف يقول...

صباح الفل يا سهوره

ومش هقولك حاجه ولا هعلق على اللى أنت كاتباه لنى عارف إنها حاله عابره وبتعديها بسرعه كالعاده

داليـ ـ ـ ـ ـ ـ ــــا يقول...

ساسو حببتى

اولا انا مش عايزاكى تضايقى نفسك وزى ما قلتى انك ولعتى فى كل حاجه جواكى عشان مترجعلهاش تانى وده شيئ حلو اوى

بس كويس انك كتبتى كل الا جواكى وخرجتيه

كمان حاجه صدقينى محدش فى الدنيا يستاهل انك تكتئبى عشانه

نفسى اقلك كلام كتير اوى

وبصى دى مرحله وهتعدى
هتعدى بإذن الله
كلنا بنمر بحالات من النوع ده وبتعدى
هتاخد وقتها وهتعدى

ربنا يكرمك ويعديها ع خير

Tears يقول...

حمدلله على سلامتك اولا :)

عارفه بالرغم احساسك بالاكتئاب بس أجمل شىء ان فى كل كلمة تعبير عند ده فيه برضة تعبير عن القوة وأهم حاجة لان لو الضعف تمكن من انسان مكتئب ح يدمرة

حاولى تغيري جو و تتفسحى و تروحى سينما و تتغدى بره و تشوفى اصحابك او اشغلى نفسك باى شىء لمدة اسبوعين بعدها ح تلاقى المرحلة الصعبه دى عدت و حتى لما تفكرى فى كل حاجة تانى ح يكون وقعها أقل


تحياتي

عاشقه الرومانسيه يقول...

انا بامر بكل اللى انتى قلتيه ده او اغلبه
ولكن انا فضلت السكوووت
لان طولها زى عرضها مش هتفرق

♥♥ شذا ♥ الروح ♥♥ يقول...

ممممممممممممم


ازيك يا بتوته انتى وحشتينى خالص مالص اووووووووووووووووووووووووى

انا جايا احجز لانى راجعه من الشغل هلاكانه


هقرء بعد شويه لان دى نفس حالتى

فاصل ثم أواصل

حسن ارابيسك يقول...

الحقيقة
لم اعبأ بمقدمة التدوينة فلم ترهبني لأتركها دون قراءتها
يشهد الله انني سعدت جداً بقرأتها وبتلك الفضفة التي باح بها قلبك قبل قلمك وتلك اولا حالة صحية حتى وان كانت الفضفضة في شكل كتابة مثلما فعلتي هنا
كما أعجبني شكل التدوينة التي تذكرني برباعيات صلاح جاهين ولكل رباعية حكمة وفكرة من تجربة ذاتية
هناك بعض منها الحقيقة تأثرت به وأصابني مابين سطورها من مشاعر لم تكتب لكنها كانت واضحة وساطعة تكلمت نيابة عنك بالكثير والكثير
دائما وأبدا التجربة الانسانية ثرية بكل أبعادها لسنا دائماً على صواب ولسنا دائما على خطأ كذلك كل الأمر مع من حولنا
لايسعني في النهاية الا تحيتك على تلك التدوينة الأدبية كما احييكي على وقوفك أمام نفسك بكل تلك الصراحة والوضوح مع نفسك ومع الأخرين
تحياتي
حسن أرابيسك

Mado يقول...

البوست دى ماتطلعش غير من حد فعلا مكتئب جدا
ربنا معاكى

مدونتك جميله جدا .. متابع ان شاء الله :)

-----
مدونتى شخصيه ساخره
http://m-myzone.blogspot.com/

♥♥ شذا ♥ الروح ♥♥ يقول...

انا جيت
ممممممممممممممممم


بصراحه مش عارفه اقولك ايه
غير ازمه وهتعدى مش لوحدك اللى مريتى بكده انا كمان واكتر منك

قلبى معاكى
ربنا يفك كربنا احنا الاتنين يارب

كونى كما تحبى
وخليكى قويه
معلهش هى كده حال الدنيا
يوم ليك ويوم عليك

احبك فى الله

ساسو يقول...

حبيبه قلبي الجميله سهر
وحشتيني أوي يا قمرايه
بجد احساسك جميل
ومدونتك كلها رقه
ولها رونق متميز جدا
وبجد انا بستمتع لما بقرالك يا أجمل ساسو

القمرالباكي يقول...

السلام عليكم ورحمه الله وبركاته
ازيك ياقمر منورانا من بعد غياب
كنت مشتاقه لمواضيعك بس الموضوع ده مالو غامق اوي كده
باذن الله بعد الفضفضه دي هتكون حالتك احسن وحزنك هيخف وترجعي لينا متفائله باحلامك وكتابتك
ربنا يسعد قلبك

موجة يقول...

بت
يالهوووووووووووى
البت اللى حيلتى ضاعت
ايه يابت اللى جالك على غفلة ده
دانتى عملتيلى تربنتينا خالص وهى مش ناقصاكى
وهى عاملة ايه دلوقت
بس ايه موضوع الادمان ده عجبنى مووت
اصلى بفكر انحرف
وادينى فى الهايف وانا احبك ياننس
نفسى من هذا المزنق اهدى الاغنية دى لكل شاب وكل فتاه واقولهم لا تنحرفو لو عمك سرق فلوسك بوس ايديه شعر ودقن
الاغنية هى
اكل العسل حلو بس النحل بيقرص شرب الحشيش مزاجة عالى والراجل اللى يجي ويكرس
واييييييييييييه
منك للى كلت دراع جوزها

Ms Venus يقول...

سهر يا جميلة


حالة وهتعدى صدقينى
اسألينا كلناااا

ياما مرينا بحالات زى كده واقسى كمان

وردة لعيونك

الحب الجميل يقول...

الدنيا بترقص بينا كلنا والله
ساعات الواحد بيكتب كلام كتير ملهوش معنى المهم يفضفض باى حاجه عن اللى جواه

ربنا يسعد ايامك يارب

سعدت بمرورككثيرا ودوام التواصل ان شاء الله
اسمحلى لى باضافة تحديث مدونتك عندى للمتابعه وشكرا

تحياتى

Bent Men ElZaman Da !! يقول...

"برغم ان صورتك يابابا جمبى ألا أنى بتلاشى أنى ابصلك
لحد النهاردة مش قادره استوعب فكرة انك خلاص فارقت الدنيا"
حسيتها اووووى فكره انك بتتلاشى تبصى للصوره
مش لانك مش عايزه تشوفيه
لكن عشان مش تحاولى تقنعى نفسك ان ده حصل فعلا

مش هاقولك غير ربنا يعديكى من حاله الاكتئاب دى على خير ومش تطول كتير
وبعدين الاكتئاب ده بقى سمه مميزه بين الكل
ربنا يهديلك الحال

موناليزا يقول...

فضفضى يا حبيبتى وقولى كل اللى جواكى
بس تأكدى ان كل حاجة بتاخد وقتها وبتخلص مهما طال الوقت ده

تمنياتى لك بالسعادة وراحة البال

ســـهــــر يقول...

ليله شتاء

وعليكم السلام ورحمه الله وبركاتة
ربنا يخرجك منها على خير يا قمر
ميرسى ليكى

ســـهــــر يقول...

أحــوال الهـوي

ياااااااه ياريت دة حلم وامنية العمر يا استاذى
والطيب أحسن طبعا :)

ميرسى ليك وشرف ليا ان مدونتى نالت اعجابك بجد ويارب يكون اختيار الاغانى عجبك

شرفتنى

ســـهــــر يقول...

هوبتي

هوبا يا قمراية منورانى
وسلامه قلبك من الاكتئاب يا حبيبتى
تعالى يا ستى نخرج انا معنديش اى مانع ايدى على كتفك

نورتى المدونة يا بيبو يا جميلة

ســـهــــر يقول...

محمود ناصف

صديقى الرائع جدا
ان شاء الله يا محمود كلة هيعدى
دى حاجة صحيه جدا
نورتنى يا حودة

ســـهــــر يقول...

داليا

حبيبه قلبى يا دودى متحرمش منك ابدا وانا مقتنعه ان محدش يستاهل ان الواحد يكتئب عشانة بس دى تقدرى تقولى عليها شوية تراكمات أدت للأكتئاب يا دودى
ومقدرش اكتئب يابنتى وانتى موجودة
ولا اية يا ست الكل ؟

شرفتينى يا اغلى دودو

ســـهــــر يقول...

Tears

الله يسلم قلبك يا جميلة
وعلى فكرة انتى خلتينى اقرا البوست تانى عشان الملحوظة اللى قولتى عليها
وفعلا حاجة حلوة جدا تصدقى بقا

وانا فعلا قررت انى أغير جو ووالله قريب جدا من اللى اقترحتية عليه

ميرسى ليكى يا جميلة نورتينى

ســـهــــر يقول...

عاشقه الرومانسيه

بعد الشر عليكى من الأكتئاب يا دودووو
بس حاولى تتكلمى مع حد قريب ليكى وان شاء الله تبقى كويسة

نورتينى

ســـهــــر يقول...

♥♥ شذا ♥ الروح ♥♥

انتى وحشاااااااانى أكتر يا قمر
وربنا يعينك يا حبيبتى وميرسى ليكى
انتى بجد حد جميل يتحب
وكلة بيعدى الحمد لله
شرفتينى جدا

ســـهــــر يقول...

حسن ارابيسك

أنا بجد مش عارفه أقولك اية
كلامك أكبر من اى تعليق علية حقيقى
والحمد لله ان المدونة والبوست برغم عدم ترتيبة عجبك

فعلا حياة الأنسان كلها عبارة عن مجموعه تجارب منها الناجح ومنها الغير

شرفتنى بجد ومبسوطة جدا بتشريفك ليا

ســـهــــر يقول...

Mado

أكيد أكتئاب يا مادو :)
واكيد هزور مدونتك ويدوم بينا التواصل شرفتنى

ســـهــــر يقول...

ساسو

انتى كمان وحشانى يا بنوتة جدا
والمدونة وصاحبتها تحت امرك يا توتة
شرفتينى

ســـهــــر يقول...

القمر الباكى

معلش يا دودو نكدت عليكم
وحشتينى جدا
وان شاء الله كله يبقا كويس
نورتى الدنيا كلها يا بنوتة

ســـهــــر يقول...

موجة

هههههههههههههههه
يا مكنونة
بصى انا من وقت م الكومنت بتاعك وصل وانا كل مقراة اموت على نفسى م الضحك
ربنا يخليكى ليا يا اجدع موجةةةة

وعاوزة الغنوة التانية اللى بحبهااااا
حجرين ع الشيشه :)

نورتى يا روح قلبى انتى

ســـهــــر يقول...

Ms Venus

فينوستى الرقيقه
ان شاء الله كل حاجة هتبقا كويسة يا قمراية ميرسى لتشريفك

ســـهــــر يقول...

الحب الجميل

اكيد طبعا بنمر بأكتر من كدة وهنمر بأكتر من كدة كمان والله المستعان

ويشرفنى ان حضرتك تضيفنى طبعا
وانا هضيفك عندى وان شاء الله يدوم التواصل بينا

شرفتنى

ســـهــــر يقول...

Bent Men ElZaman Da

انتى لمستى أكتر حاجة توجع على فكرة
الله يرحمه وفى الجنه برحمه الله ان شاء الله

وبكرة أكيد أجمل يا بنوتة
نورتينى والله

ســـهــــر يقول...

موناليزا

موناليزا الرقيقه جدا
منورانى يا قمر وكل حاجة مهما طالت بيجيلها وقت وتنتهى بأذن الله

شرفتينى جدااااااا

sal يقول...

سهر
عالم النت ليس افتراضى وخيالى
انه عالم حقيقى لو وجد من يملك
فضيلة الصدق مثلك

احييك على هذه الفضفضة
واتمنى لك كل الخير
اسمعى نصيحة تييرز وان شاء الله
ازمة وتعدى

تحياتى

فضفضه يقول...

ساسو
كلنا بنمر بأكتأب معلش فتره وهتعدى
ربنا يفك همك ويرضيكى
حاولى تغير ى روتين حياتك وان شاء الله هتروقى
تحية لكى

had-befham يقول...

من شدة جمال كلماتك وصلتينى لنفس درجة اكتئابك
لأنى حسيت الكلام اوى

Malooka Yousef يقول...

برغم ان كلامك فيه الغاز شوية بالنسبه لى بس هو فعلا شكل ف حاجه مضايقه بس هو لازم كل واحد فينا يجى عليه فتره يحصله كده ولو محصلناش كده يبقى احنا مش بشر ولا طبيعين يبقى اكيد فينا حاجه غلط لو عشنا الدنيا كده ضحك وتهريج وخلاص وصدقينى فترة وتعدى وتروح ترجع تانى هو دا حال الدنيا ربنا يوفقك ياقمر ومدونتك رقيقه اوى وفيروز عاملة شغل عالى اوى

أم الخــلـود يقول...

(حملة الجسد الواحد)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!

صورة الشعار .. في مدونتي كركر .. ويكتبون فوقها ..

(حملة الجـسد الواحـد)

رابط المدونة

http://krkr111.blogspot.com

جعله الله في ميزان حسانتكم .. آمين

Lady E يقول...

هتعدي يا ساسو

اللي له بداية له نهاية كل حاجة في دنيتنا بتعدي حتى الاكتئاب لما بيبجي بيبقى ضيف تقيل اوي بس بعدما بيمشي بنحس بطعم الحياة احلى بكتير من غيره

عليكي هوم وورك تشوفي الفيديو اللي في اخر بوست عندي وزيادة توكيد ادي لينك الفيديو عاليوتيوب : http://www.youtube.com/watch?v=pDGW8nbXv-s

روقي واتمنى تخرجي من الحالة دي قريب

أتنين حبيبين يقول...

مش لوحدك

كلنا بيعدى علينا الحاله دى

ونفس الشعور

قلبى معاكى حبيبتى

تقبلى مرورى

توتا

فارس عبدالفتاح يقول...

اول حاجة مواجهة الحقيقة


ثانياً : المقدرة على استيعاب هذه الحقيقة .

ثالثاً : المقدرة على تمالك النفس .


رابعاً : استبقاء الايمان بالقدرة على تجاوزها والعمل على ذلك .


اتمنى لك التوفيق ،،



فارس عبدالفتاح ... قومي عربي

داليـ ـ ـ ـ ـ ـ ــــا يقول...

ساسو

فينك

طال غيابك
ايييييييييه الغيبه دى

منتظراكى تطمنينى عليكى

ســـهــــر يقول...

sal

ميرسى يا حبيبتى على الكلام الحلو دة ربنا يكرمك والحمد لله على كل حال
نورتينى

ســـهــــر يقول...

فضفضه

الحمد لله يا بنوتة الدنيا ابتدت تتظبط
وربنا يكرمك وعلى فكرة وحشانى اوى

ســـهــــر يقول...

had-befham

يانهار ابيض ربنا يبعد عنك الآكتئاب يارب صدقنى صعب
وميرسى ليك كلك زوق نورت الدنيا

ســـهــــر يقول...

Malooka Yousef

انتى صح دوام الحال من المحال
وكل شىء بيد الله واكيد بيتغير مفيش حاجة بتخلد يا قمر
وفيروز أهم حاجة تكون عجبتك :)
نورتينى

ســـهــــر يقول...

ام الخلود

أسفة يا حبيبتى على التأخير :(

ســـهــــر يقول...

Lady E

أسفة أتأخرت عليكى يا قمر
والحمد لله كل شىء بقا فى تحسن يا قمر
ميرسى لسؤالك وربنا يكرمك يا جميلة نورتينى

ســـهــــر يقول...

أتنين حبيبين

اتمنى تكونى انتى كمان خرجتى من الحالة دى يا توتة وايامك كلها تكون حلوة ان شاء الله شرفتينى

ســـهــــر يقول...

فارس عبدالفتاح

متشكرة جدا على الكلام اللى فعلا لية تأثير كبير وربنا يكرمك ونورت المدونة

ســـهــــر يقول...

داليـ ـ ـ ـ ـ ـ ــــا

دودو يا حبيبة قلبى ربنا ميحرمنى منك ولا من سؤالك يا ارق داليا تسلميلى يا قمر اونا اهه يا جميلة وحشاااااااااانى اوى

هي وظروفها يقول...

لا اله الا الله

سهر بنت حوا وادم

مكتئبه يا ناااااااااس

صحيح ف ناس لما بنعرفها وتبعد بيسبيوا حاجات بتفاصيلها
كلنا ما نقابلها نفتكرهم

بس لا يقع ف ملك الله الا ما يريد

واي شيء يضيع من ايد الواحد شووووور مهواش نصيبه سواء حافظ عليه او حاول بكل طاقته او حتي محاولش بردو لو عمل الالالالي مكنش هيبقي بتاعه لانه اصلا مش بتاعه
طبعا انتي مش عارفه مين الرخم الل بيعلق ده الرخم ده هو انا
وليد الدوغري

بشرى الحازمي يقول...

مريت من هنا
عجبتني مدونتكِ كثير
فتحية شكر لهكذا جمال !

الشـــــوكه النــاعمه يقول...

حاسه بيكى اوى
والله انا اكتر حد حاسس باللى كتبتيه بس بجد خفى ماتفضليش كده ها توقلى لنقطه مش هاتعرفى تخرجى منها
قلبى معاكى

موجة يقول...

بت يا سهر
انتى هترجعى ببوستاتك المهيسة ولا لاء
وهترجعى لنا تانى ولا لاء
ردى
واسالى
ومتزعلنيش منك

أحــوال الهـوي يقول...

تعرفي يا سحر
انا مش عارف انا ليه بقالي كتير ما زرتش مدونتك يمكن عشان رمضان و انا كمان منقطع عن مدونتي
بس فعلا منت هازعل لو البوست ده فاتني

غريبه مش كده؟؟؟؟
لانه فضفضة ممزوجه بفلسفة علي شوية سخرية علي جرح يئن
خلطة لا يمكن يكون معاها الدنيا بترقص

لكنها كشفت عن شخصيتك الكثير ووضحت انك انسانه حساسه جدا و شخصية مركبه لكن في النهايه قوية

سحر اعتقد اني فهمت الكثير من بين السطور المبهمه و الالغاز المتعمده

و احببت حوارك مع بابا احسسته جدا لاني اب و احب ابنتي كما تفعلين و احس بالغموض ناحيتها ايضا و يبدو انك فسرتي بعض منه

عزيزتي لن اطيل عليك

تحياتي

داليـ ـ ـ ـ ـ ـ ــــا يقول...

انتى كمان يابت وحشانى
انا مش عارفه فى ايه
انتى باعده ليه عننا
اكيد فى حاجه احلا مننا واخدكى مننا
اقطع دراعى من هنهوه
ههههههههههه
اذا ماكان فى حاجه كده جميله ولذيذه وحلوه واخداكى مننا
هى ايه بقه الله اعلم
هفكر وابقه اقولك

ارجعى بقه يابت نورى المدونه من تانى بالبوستات

القمرالباكي يقول...

السلام عليكم ورحمه الله وبركاته

كل سنه وانتي طيبه
ازيك ياقمر فينك من زمان هو الغالبيه معتزل والا ايه
اظهري وباني هههه ابقي طمنينا عليكي
دومتي بخير

Tears يقول...

صار لكى فترة طويلة لا تكتبى

اتمنى ان تكونى بخير

أتنين حبيبين يقول...

حبيبتى

اخبارك ايه

يارب تكونى بخير
وايه الغيبه الطويله دى ياريت ترجعى وطمنى الناس اللى بتحبك عليكى

انا قلقانه من غيابك يارب تكونى يا حبيبتى
ياريت طمنينى عليكى

توتا

بوسي يقول...

خلى عندك امل
ومتخليش حد يولك للدرجة دى ولا الحياة نفسها من غير الامل الانسان ممكن يموت من التشائم تفائلى وبصى للحياة من وجهة نظر عكس الى شايفها دلوقتى

كل سنة وانتى طيبة

عمرو وجيه يقول...

salmo 3aleko


ربنا معاكي فعلا الإكتئاب شيءصعب

مدونة و الله جميلة جدا


شرفت بزيارتها

nor يقول...

مرحله اكتئاب بشعه و عرفها لاني من حوالي 6 سنين مش عارفه اخرج منها نوهائي لا بالبنادول و لا بالمهدئات ولا ولا
...ربنا كريم حاولي تخرجي بسرعه بحب كلماتك و بقرأ لك كتير بس اول مره من فتره اعلق عندك
تحياتي يا صغيرتي