7:29 ص

مـشــروع حــيــاتى

بواسطه ســـهــــر






صــبــاح الــخـــيـر
ازيكم كلكم وحشتونى بجد

وملحوظة كمان البوست طووووووووووويل شوية

اللى زهقان او مخنوق او أرفان من حاجة مهما كانت

اية هى الحاجة دى ميقراش البوست حفاظا هلى هدوءة

أنا عاوزة افتح كافيه بحق وحقيقى وفى لية اكتر من اسم فى دماغى

فيروز كافية أو جاره القمر أو بعدك على بالى

طيب ما علينا مش هختلف ع الاسم دلوقتى الاسم سهل

عايزاة فى مكان هادى جدا وزباين الكافية مش هيبقو أى زباين لالالا
مستحيييييييييييييل وبعدين اللى هيدخل الكافيه بتاعى دة هيبقا المشروب الاساسى فيه


الـــــــــــــــقــــــــــــهـــــــــــوه

عايزة الكافيه الديكور من جوة يبقا رقيق وبسيط

وهيبقا فى كل استيشن لون مختلف

ولون الكافيه هيبقا كله بنفسج


بأختلاف درجاتة وعلى كل طاولة فازة صغيره جدا فيها وردة بنفسج

والكراسى هتبقا قطيفة لونها غامق عشان تدى احساس بالدفا

عاوزة أجيب باند فى الكافيه كلاسيكى جدا

اجيب مطربه تغنى اغانى قديمة بلحن هادى جدا

ودة لانى هجيب بيانو أسود كبير فى وسط الكافيه

وعاوزة واحد كبير بشعر أبيض يعزف عليه




وهجيب عازف كمان

هحط صورة كبييييييييييييييييرة لفيروز فى اول الكافيه

وجمبها هيكل عربية صغنن كدة لونة ازرق

عربيتها اللى عطلت منها فى ميس الريم :)



وانا اللى هشرف على الكافيه وانا اللى هفتحه كل يوم الصبح

وانا رايحه الكافيه هشترى الجرايد اقراها مبحبش اقرأ الجرايد ع النت

بحس ان مالهاش طعم



وهعمل مكتبة فى الكافية بسيطة ومش كبيرة

هحط فيها كل روايات أحلام مستغانمى ودواوين نزار وجويده

وهجمع كل مقالات شهرزاد واعملهم فى مجلد

هجيب بخور بريحه الصندل والفل والتفاح بيبقا الجو عبقرى بالبخور وريحه البن

واكيد هخلى مكان مخصص للى بيدخنوا بس ممنوع الشيشه

مش لآنى بكرها لا بس لآن جو الكافيه مينفعش فيه شيشه

انا كمان نسيت اقولكم انى هشغل فى الكافيه اغانى فيروز دة الاساسى


وفى اوقات طبعا هريح الست فيروز شوية

وهشغل منير و وجيه عزيز

وطبعا كلة على الجرامافون







دة حلم حياتى على فكرة أمنيه حياتى يتحقق ولو بعد عمر
المهم انة يتحقق

فكرت كتير جدا اعمل دة ازاى لاقيته عاوز فلوس كتيييييييييييييييييييييييييييييرة جدا

وطبعا صعب ويكاد يكون مستحيل

المهم انى دونت الكلام دة عشان يوم من الايام بأذن الله

لما فتح الكافيه أبقا أخد برنت من الكلام دة

وأحطة جمب صورة فيروز :)

وصباحكم فيروزى

85 شربوا معايا القهوه:

AhMeD RaDy يقول...

المشروع حلو اوى بجد يا ساسو

واتمنى انك تحقيقيه ..

وكمان اختياراتك ورسمك للديكور لذيذ ويمشى جدا

بس هيكلفك كتير بقى

فى مطعم اسمه استديو مصر .. ابقى شووفيه تقريبا نفس الاستايل اللى انتى بتتخيليه

بس هو بقى بيتكلم عن اتسديو مصر يعنى صور عبد الحليموام كلثوم محمد فوزى وهكذا

تحياتى واتمنى انك تحقيقى حلمك وتبقى تشغلينى عندك بقى

محمود ناصف يقول...

فيروز 80% ومنير ووجيه 20% مع بعض البنفسج هى دى الخلطه السحريه

ياه دا هيبقى جامد جدا يا سهر بس أنا عاوز صورة ناصر كمان فى ركن كده علشان أبقى أقعد فيه وتسميه ركن الكرامه مليش دعوه بقى

بس بجد لو المشروع ده اتعمل بكل الفيروزات والبنفسج ده هيبقى فعلا جزاب بشكل غير عادى

وربنا يوفقك وتحققى كل أحلامك

مهموهـــــــة يقول...

الله يا سهر
خليتيني متشوقة اروح االكافيه ده اوق
و اختارتي لون البنفسج احلى و اروع لون في الدنيا
بجد كل اختياراتك جميلة اوي اوي

بجد نفسي اجي الكافيه ده


لو تحبي نتشارك فيه و نعمله انا ما عنديش اي مانع

ده مشروع رائع مش مسالة فلوس
مسالة حلم بيتحقق و جميل و رقيق


ربنا يوفقك و تحققي احلامك كلها

خالص حبي و تقديري

Hesham يقول...

على فكرة ياسهر انا زمان كان عندى حلم يشبه هذا الحلم بس مش كافيه كان نفسى افتح مطعم على الطراز الفرنسى القديم يقدم مأكولات فرنسيه واغانى فلانسية على شاكلة جو داسان وفلسيب نواريه وغيرهم وحتى السفرجية لابسين فرنسى يعنى حاجة تشبه كده ولكن فى الاخر لم يتحقق غير شويه سي دى هات فرنسية جبتها معاها من بره اتمنى ان يحقق الله احلامك

أحــوال الهـوي يقول...

انتي مزاجك عالي جدا
اولا اختيار فيروز عبقري
و ما اخبيش عليكي انا بافتح مدونتك علشان اسمعها و برضه انا عارف الموقع اللي بتنزلي منه الاغاني بس اختياراتك رائعه عشان كده بااسمعها عندك

برجاء لما يتفتح الكافيه اعرف مكانه لان الجو اللي بتوصفيه رائع

ربنا يحقق احلامك و نلاقي مكان محترم مبهج نشرب فيه القهوة

تحياتي

سمع هوص (Abo 3li) يقول...

تخديني شريك؟؟؟
بالمجهود بس ااااه... وليا 70% من الارباح...
ايه؟؟؟ كتير؟؟ كلمة زيادة وهيبقو 80...
احنا هنلعب ولا ايه....
هههههههههههه...

ربنا يحققلك احلامك كلها...

NeVeN يقول...

سهورة

ايه الموود العالى دة؟

انتى بجد مش ممكن انا عمرى مشفتك بتتكلمى عن الموضوع دة بالشكل دة مش عارفة حساكى متحمسة اوى
ربنا يحققلك كل احلامك يارب
نفسى فى مكان كدة يكون ليه طابع خاص مختلف

فيروز وقهوة ومنير ووحيه و بنفسج وعربية ميس الريم
كدة منتهى الجمال بجد انا نفسى اشوف حلمك دة بيتحقق وطبعا انا شريكة فيه عافية هى

على الهامش كدة
تاثير البوست دة انه خلانى اول مقريت حتى قبل ما اعلق اقوم اعمل فنجان قهوة وولغت عود بخور وسافرت بروحى مع فيروز

بموت فيكى وفى احلامك العبقرية دى


مساءك فيروزى يا نور عينى انتى

رحــــيـل يقول...

على فكرة بقة هيبقى مكان تحفه جدااااااااااا يا سهر

لما تحقييه اكيد هاجيييلك نبقى نعمل لقاءات المدونين عندك:)

طالبة مقهورة ..درجة أولى يقول...

وااااااااو

اشطة جدا يللا نشترك انا وانتي ونعمله..ونخصص جزء للطلبة المقاهير زيي يكون فيه بلايستيشن واشتراك ايه ار تي وكمبيوتر جيمز وسايبر بالمرة عشان كل واحد يذاكر براحته ^_^

بالمناسبة ياريت تزودي في المكتبة بهاء طاهر عشان بحبه اوي :)

وياريت الحلم يتحقق ف يوم وهتعزميني ف الافتتاح ان شاء الله بس قوليلي ده هيبقى في القاهرة ولا في انهي حتة في مصر عشان احجز تذكرة القطر من دلوقتي

داليـ ـ ـ ـ ـ ـ ــــا يقول...

جميله بجد وحلمك لذيذ

تعرفى بجد اختيارك للديكور لذيذ
ولو هختار ليكى اسم هختار
فيروز كافيه

تعرفى انا كان نفسى يكون عندنا فى المحله كافيه للبنات والسيدات فقط

مش لانى فى حاجه بينى وبين الرجاله
لا بس عشان نعرف ناخد حريتنا كبنات وكده

لو تعرفى تضيفى للكافيه بتاعك مكان مخصص للبنات والسيدات هيبقا روعه
ولو عرفتى تعملى منه فرع فى المحله
هتلاقينى مقيمه فيه 24 ساعه
ههههههههه اه والله

المهم ان الديكور الا اخترتيه ده رومانسى اوى

ربنا يحقق لكى حلمك يااااارب
وعن قريب بإذن الله يأحلا ساسوووو

Ms Venus يقول...

الله عليكى وعلى حلمك


جمييل اوى يا حبيبتى لدرجة انى نفسى بجد تحققيه واجى فيه


ربنا ياارب ينولك كل احلامك ويوفقك

بس بجد ذووقك عالى اوى اوى

Tears يقول...

الكافية ده ح يكون هايل بس اعتقد صعب تلاقى له زبائن لان حاجة شيك بالطريقة دى مش ح ينفعها الشباب المتسكع على النواصى اللى نازل بحلقة و معاكسة فى الخلق

انتى عايزة ناس راقية من زوار الاوبرا و الموسيقى العربية

جمهور حفلات ام كلثوم الراقى اندثر

MONTY يقول...

ااااااااااااااااه قولى بقى انك عايزه تلمى مننا تبرعات
مانا فهمه الحركات دى ههههههههه
ماشى يا سوسو انا موافقه جداا
وابقى سميه "على كيف كيفك" او "ريحة الحبايب" يعنى عشان البخور وكده وانتى عارفه كويس ان البخور معاكى له معزه خاصه ف قلبى
بحبك والله ويارب تحققى كل اللى تتمنيه

أحمد الصعيدي يقول...

وفقك الله دوما ورزقك النجاح كيفما شئتي


أسعدك الله

فضفضه يقول...

يارب يحقق لكى امنيتك
زوقك عالى جدااااا
واختيارتك كلها من اسم الكافيه والتصميم والادوات والعناصر والاشخاص كلها متناسقه ومتناغمه وفيها روح الرومنسيه
ربنا يسعدك ويحقق احلامك
ونيجى نقعد فى الكافيه ماهو بتاعنا بقا ههههه
تحياتى لكى

مرايتى يقول...

جميل إن يبقى عندك حلم ومخططه له كمان

وضايفه عليه لمساتك الخاصه من الجمال
ربنا يحقق لك كل أحلامك يارب وإن شاء الله تعزمينى

تحياتى ياقمر

غروب يقول...

ساسو حبيبي

مش تنسي تحجزيلي ترابيزه بعييييييييييييده عن الكل

يدوب الصوت اللى يوصلها يكون صوت خااااااافت لفيروز

بس بلاش قهوه لانى ممنوعه منها

ممكن قرفه بلبن ؟؟؟؟؟؟؟

على فكره كان ليه حلو شبه كده اناواصحابي الانتيخ

لكن مش كافيه

بجد حلمك جميل

يارب يا حبيبتى تحققيه

ملحوظه:

ديكور الكافيه حلو اوى

بس اللون البنفسجي ممكن يدي للبعض احساس بالحزن ؟

خليه لو اللون ده يكون الفاتح منه

انا بمممموت في اللون ده

ربنا يحققلك امانيكي يا قمر

القمرالباكي يقول...

السلام عليكم ورحمه الله وبركاته

مساء الخير ياساسو

حلمك جميل مليان رقه واناقه
عجبني فعلا
خلاص ادخل معاكي شريكه بالنص هههههه
ربنا يحقق لك جميع احلامك ةوباذن الله قريب وفي نفس المدونه الاقيكي بتقولي عن افتتاح الكافيه ونبارك لك كلنا ونعيش معاكي سعادتك وطبعا نتعزم ع حسابك

دومتي بخير

إمرأه من ثلج يقول...

اولا قهوتى سكر زيادة زيك

وهاجى واشربها قريب كندك فى الكافية

ربنا يسعدك ويحقق لك كل الى بتتمنية

مشروع تحفة

موجة يقول...

سهر روح قلبى وبنوتى وبطتى وقطتى وكل حاجة اخرها(( اتىىى))
بدايه احب ارحب بيكى فى برنامج
برنامج ايه انا فى مدونه
سورى
بصى ياستى
الكافيه هيبقى اسمة موجة سهر كافية
ماشى
ولو مش موافقة
هقتلك
ثانيا انا بحب حليم
يبقى فيروز وحليم
ثالثا القهوة مشروب اساسى والكابتشينو المشروب اللى بعده علطول
كابتشينو ابو رغوة مش التانى
رابعا بقى
المكان هيكون فى بيتنا
بقى
اهدى مكان فى مصر
والزباين
هيكونو مقاطيع التدوين
وبصراحة هتكسف ادفع حد الحساب يعنى هفتحها سبيل وهنشحت بعد اسبوع

Timo.. يقول...

صباحك معطر بعبير البنفسج.
بجد خلتينتي اشوف جو حلو وانا باخد قهوتي في الكافية التخيلي بتاعك واستمتع بصوت الملائكة وهي بتشدوا وباستمتع بعبير الموسيقى والرائحة الهادية في المكان الجميل ده..

اتمنى تحققي حلمك في يوم ونفتكر معاك انه كان في يوم حلم واصبح حقيقة :)

ســـهــــر يقول...

AhMeD RaDy

ميرسى يا احمد ويارب يسمع منك
وعلى فكرة فى كتير اوى كافيهات بنفس الشكل اللى بتحكى عنه والصور كلها جوة لفنانين بالابيض واسود وبيكون لذيذ
وفعلا مكلف جدا :(
نورتى يا احمد بجد

ســـهــــر يقول...

محمود ناصف

ههههههههه
عشان تعرف ان زوقى عالى :$
وعشان خاطرك هعملك ركن واحطلك صوره الزعيم عبد الناصر انت تؤمر يا حودة
منورنى

ســـهــــر يقول...

مهموووووووهه
ميرسى يا توتة يا حبيبه قلبى
وانتى حقيقى اول حد يعرض يشاركنى صدقينى هيكون ليكى الآولوية
وتعالى بقا نتشارك :) يشرفنى تشاركينى الحلم يا قمر

ســـهــــر يقول...

استاذ هشام
رائع المطعم اللى اتكلمت عنه
ويارب تحققة كمان وعن قريب
وميرسى ليك جدا دايما منورنى

ســـهــــر يقول...

احوال الهوى

استاذى الجميل ميرسى لزوقك والله
ويشرفنى انك بتدخل المدونة عشان تسمع فيروز الجميله ست الحزن والجمال
وان شاء الله تشرفنى فى الكافيه أن ربنا أراد انة يتحقق شرفتنى جدا

ســـهــــر يقول...

ابو على الجن
هههههههههههههههه
لا ياراجل انت متساهل معايا اوى اية رايك اعمل الكافيه واشتغل كمان تحت ادارتك يا ابو على :) ههههههه
دة انت تشرف وتنور وتأنس يا علوة يا جميل يا منورنى بأستمرار

ســـهــــر يقول...

نوفا أختى حبيبه قلبى
شفتى بقا عشان الحلم مستحوذنى ازاى ؟
وانتى جزء من الحلم دة ياما حلمتى بيه معايا يا ام لارا ويارب يتحقق ونعمل ركن للأطفال نسيمة لارا فريندز :)
وقوليى القهوه طلعت مظبوطة ولا لا يا قمر منورانى يا روح الروح يا كينونة الذات :*

ســـهــــر يقول...

رحيل

والله يا سوسو انتى والمدونين تشرفوا وتنورا وطبعا على حساب الكافيه يا قمر ميرسى ليكى ونورتينى يا جميلة

ســـهــــر يقول...

طالبه مقهوووورة
انتى سكرة دة مبدئيا يا توتة
وبلاى استيشن كمان يا كميل يا كميل تؤمرنى دة الكافيه واصحابه تحت امرك يا توتة وان شاء الله يتحقق الحلم واجى بنفسى اخدك مكان مكنتى يا قمر تنورى وتشرفى

ســـهــــر يقول...

داليا

اولا انتى من المحله يعن بلد الحباييييييييييييييب يعنى بلد صحبتى وانتيميتى وحبيبه قلبى واحلى ناس كمان

وعلى فكرة انا فكرت يكون فى استيشن للبنات واستيشن للعائلات اللى معاهم اطفال كمان ويااااااارب بس احققة افتح أول فرع فى المحلة وتشرفيه وتنورية انتى وكل صحابك يا قمر انا مقدرش ارفض طلب لآلآلآلآلآلآى حد من بلد الحبايب يا دودى نورتينى والله ويارب يدوم التواصل يا بنوتة

ســـهــــر يقول...

فينوستى الجميلة
ميرسى يا قمر وان شاء الله يتحقق وتشرفينى يا جميلة

ســـهــــر يقول...

تيرز

بصى اكيد فى ناس كتير زينا بيحبو الهدوء والجو الفيروزى دة وانا من البداية يا بنوتى قولت ان زوار الكافيه مش هيكونو اى حد ولا انا أصلا هسمح للعيال اللى بيسقطوا البناطيل انهم يدخلوة هههههههههه
شرفتينى يا قمر

ســـهــــر يقول...

مونتى
ههههههههههههههههه
تبرعات يااااااااريت ايدى على جيبك يا ستى هههههه
وبعدين يا مونتى انتى عارفة البخور يعنى انا وانتى ونوفا جزء لا يتجزء من شخصيتنا صحبتى يا حبيبتى يا منورانى بحبك انا

ســـهــــر يقول...

أستاذ احمد الصعيدى
اللهم امين ربنا يبارك فيك
ونورتنى بجد

ســـهــــر يقول...

فضفضه
ميرسى يا قمر على زوقك وكلامك الحلو
وطبعا اصحاب الكافيه امال اية
ههههههه نورتينى يا قمرايتى

ســـهــــر يقول...

مرايتى
ميرسى ليكى وادعى يتحقق وطبعا من اول المعازيم يا قمر المكان مكانك يا توتة
نورتينى

ســـهــــر يقول...

غروب روح قلبى من جوة
لية بعيد يا سارة ؟
طيب بصى انا مقدرش ارفضلك طلب مهما كان وعينى ليكى والآرفه باللبن توصلك مجرد متنورى الكافيه
وربنا يحقق حلمك انتى وصحباتك يارب

وبالنسبة للون البنفسج انا قولت يا ساسو انى هخلى جميع الدرجات موجودة
اة حزين بس بنفسج مع فيروز وكاندل وقهوه وبخور جو رائئئئئئئئئئئئئئئئئع جدا ان شاء الله يتحقق الحلم وتشوفى بنفسك يا احلى ساسو فى الدنيا

ســـهــــر يقول...

القمر الباكى
ميرسى يا دودى يا قمر
وربنا يسمع منك يارب ويلا نتشارك مفيش مانع يا داليا ايدى على كتفك يا قمر
نورتينى يا دودى يا جميلة

ســـهــــر يقول...

أمرأه من ثلج

يا جمالك يا جمالك قهوتك زى قهوتى يبقا خلاص نشربها من بعض يا قمر دى حاجة تشرفنى وان شاء الله يتحقق الحلم وتشرفينى

ســـهــــر يقول...

موووووووووووجه
ههههههههههههههههههه
اة يا مجنونة طب عايزة نعمل عمل انتحارى ونبقا احنا الاتنين مسؤلين عن مكان واحد يالهووووووى هههههههه

وحليم والست كمان انا بس نسيت اقول انهم من ضمن قائمة الاغانى يا موجتى
والكابتشينو ابو رغوة دة فى الشتا مقولكيشششششش حاجة كدة عاملة زى المايه الساقعه فى عز الحر

وانا مقدررررررررش اصلا ارفض ل موجة روح قلبى طلب دة انتى حبيبتى يا بت

منورانى يا جميلة

ســـهــــر يقول...

تيمو
صباح الفل على عيونك انت وفريده كمان :)

ومبسوطة ان الجو عجبك واكيد هتبقا من زباينى المميزين يا تيمو

نورتنى وشرفتنى والله

الشـوكة الــنـاعـمـة يقول...

بصى المشروع تحفه اوى واللون البنفسج اختيار مميز جدا
وكافيه لو اسموا بعدك على بالى هايبقى اجمل واجمل
وياريت بقى تعملى لنل ركن كده رومانسى عشان المتخاصمين
شكلك فنانه بس اشمعنى القهوه
تحياتى

ليله شتاء يقول...

السلام عليكم ورحمة الله وبركاته
بصى بقى أنا بعشق فيروز ونزار قبانى وفاروق جويدة يعني أن شاء الله هتلاقينى مقيمة عندك في الكافيه بس المهم أنك تفتحيه لانه هيكون مكان رومنسي جدااا أكيد زي صاحبته أصل الدال على الشئ كفاعله يعنى هتخلى المكان بروعة دى يبقى أنتى أه بقى؟

يارب تدوم أيامك بالخير والسعادة

Silver Eyes يقول...

مساء الخير يا سهر
يارب تكونى بخير يا حبيبتى

بجد البوست دا معدىىىىىىىى اوى
ممكن اقترح عليكى اسم ؟
طيب اوك
" زهرة لبنان "
هيمشى مع فيروز والبنفسج والجو الخيالى الجميل دا
بجد بجد بتمنى انك تحققى حلم حياتك دا .. ونشاركك كلنا فيه

ليا عندك واحد قهوة مظبوط باللبن :)
تحياتى يا سهر :)

عايشه لنفسي يقول...

سهر
مدونتك بجد هايله ماشاء الله عليكى
ومشروعك بجد تحفه
بس عاوز مكان في ناس وهادى يعنى يكون مش حواليه دوشه
ربنا يكرمك وتنفذي مشروعك قريب

واحب اهنيكى علي حبك لفيروز صدقينى حبيتك علي حبك ليها

Quite Sea يقول...

حلمك جمييييل جدا
:)) ,, بيتهيقلي قليل لما يفكروا في مشروع زي دة
بس بجد مشروع روعة يدل علي زوق رفيع و احساس راقي
ربنا يوفقك في تحقيق ما تريدين

غروب يقول...

ربنا يخليكي يا قمر

وان شاء الله يكوا احلى كافيه

احم احم

حضرتك ليكي واجب عندى

جرررررى تروحى تاخديه

marmar يقول...

ربنا يحققلك حلمك يا سكره وان شاء الله تفتحي الكافيه في اسرع وقت ومبدائيا انا انشالله كل ويك اند هكون عندك في الكافيه وهعملك بروبجاندا عاليه اووووووووووي
في كايرو وبراها كمان هههههههههههههه
ربنا يسعدك يا عسووله

Sharm يقول...

فيروز اسم جميل جدا
لما ربنا يكرمني ببنت هسميها فيروز ان شاء الله

saragebaly يقول...

مساؤكـِ مسك على قلبك
ايه الجو الجميل دة؟؟
كفاية اصلا اللون البنفسج وكمان بدرجاته
انا بجد بعشق اللون دة جدا جدا
وفيروز ونزار وجويدة
ممممممم
انا بحجزلي كرسي في الكافيه اهو من دلوقتي
لانك شوقتيني جدا جدا
وبجد تخيلت المنظر .. اكتر من رائع

ربنا يارب يوفقك ويحققلك حلمك يارب
وهيكون احلى كافيه بأذن الله

تحياتي لقلبك
سارة

saragebaly يقول...
أزال المؤلف هذا التعليق.
أع ـقل مـ ج ـنـونــة يقول...

يـــــــــاه

يا مليون ياااااااااه بجد

تصوري تخيلت اني قاعدة في كافيه زي دا !!

الله عليكي بجد

يارب يحققلك امنيتك يارب

تقبلي مروري ياجميلة ويارب دايما نتواصل :)

sabrina يقول...

فيروز
بعدك علي بااالي
وبنفسج
أعتبريني أوووول زبونة(وكمان هجيب معايا صاحبتي الأنتيم)
............
يا ريت كمان يبقي فيه شيكولاتة من كل نوع ولون(فاكرة الشيكولات اللي كانت في فيلم chocolat بتاع جوليت بينوش )تبقي زيها!

الشـوكة الــنـاعـمـة يقول...

سهر ازيك
انا اهديت لك بوست وعاوزاكى تفضلى تجاوبى عليه
http://forksoft.blogspot.com/

re7ab.sale7 يقول...

سهر سهر سهر حبيبتي
وحشاني كتيييييير بجد معلش كنت مشغولة الفترة اللي فاتت
بس بجد البوست ده يجنن وانا بموت في اللون البنفسجي بكل درجاته وفكرة الكافية تجنن بجد وانا معاكي اكيييد بموت في فيروز ولو احمد اخويا قرا البوست ده هيجي جري من شغله ويحيكي لانه بيموت في فيروز واكيد الفكرة كمان هتعجبة كتير , بس عندي طلب رزل حبتين واستحملي حوبة اللي هو انا شوية يعني بدل ما تجيبي واحدة تغني اغاني فيروز اجي انا يا ستي بدل الغريب وانا صوتي مش وحش للدرجة دي دا حتي عمر ما حد كلمني في التليفون الا ويقولي اية الصوت الجميل ده ....هههههه تقريبا مغرورة انا بس بجد فكرتك اكثر من رااااائعة وان شاء الله تنفذيها قريب ومشكلة الفلوس تتحل ولا يهمك يا جميل
عايزة اقولك كمان خدي ايميلي عشان نتواصل rehab_light@yahoo.com

Tarkieb يقول...

لو ح تفتحي نادي اجتماعي بالمجان ممكن تعملى كدة ...لكن مشروع تجاري وتسمعي الناس فيروز بالعافية ....مين ح يجي ليكي....معظم من يدعى انه بيحب فيروز لا يجرؤ انه يقول مابحبهاش..عشان مايتقالش عليه جاهل..صدقيني مش مهم صوتها ايه لكن حاسس انها شويش بدون مشاعر بيغني وبقول سبحان الله لولا ان العرب كانو عايزين حد ينافس ام كلثوم ما كنا سمعنا عنها....الحمد لله اني ماعندك فلوس كنت عذبتينا بيها

مدونة بحبك يقول...

السلام عليكم
انا اول مرة ادخل عندك المونة هي بصراحة جميلة وفيها مواضيع جميلة
بس بذمتك في حد بيفتح كافيه ويشتري جرايد
دي الاخبار كلها بتكون موجودة في الكافيه
ربنا يوفقك وتعملي اللي نفسك فيه كله ان شاء الله
لكي مني كل تقدير واحترام

شذا الروح يقول...

وحشتينى حبيبتى

اخبارك ايه يارب تكونى بخير

قد ايه مافيش حاجه بعيده على ربنا

وده اقل الاشياء اننا نحلم والله وحده المستعان

قولى يارب
بجد تخيلت المكان كم حكيتى عنه بالظبط

ربنا يسعدك يارب
ويصلح حالك
اللهم امين

Bent Men ElZaman Da !! يقول...

طب والله فكره جامده
ولو عملتيها تبقى فى الجون بجد
من وصفك انا تخيلته هيبقى حلو اوى وهادى
يارب تحققى يا قمر كل اللى بتحلمى بيه :)

داليـ ـ ـ ـ ـ ـ ــــا يقول...

ازيك ياأحلا ساسو

والله وحشانى
وحسيت بغيابك ده
بس احرجت انى اسأل

بس يارب يكون البعد ده كان خير ياحببتى

والله كنت مفتقداكى جامد

انا قلت البنوته راحت تحقق الحلم بقه وجايه ههههههههه

منوره عالم التدوين دايما

ســـهــــر يقول...

الشـوكة الــنـاعـمـة
والله يا قمر انا بحب غنوة بعدك على بالى جدا وميرسى على زوقك مش فنانة ولا حاجة بس هو اللون البنفسج بيخلى الواحد يطلق عنانة
والقهوة يا ستى لانى بحسها مشروبى المفضل فى كل الاوقات والفصول والظروف بس كدة
نورتينى

ســـهــــر يقول...

ليله شتاء

الله الله يا قمر ع الكلام الجميل ربنا يكرمك يارب كل زوق والله
وهتنورينى وهتبقى من غير كلام صاحبه الكافيه البيت بيتك يا جميلة

ســـهــــر يقول...

Silver Eyes

تصدقى فكرة بردو زهره لبنان
حلو الاسم على فكرة
وتنورى يابنتى فى اى وقت انا هعملة لحبايبى اصلا مش عاوزين ربح ولا كلام فاضى دى قاعده البنات بملايين الدنيا
مش كدة ولا اية ؟ هههههههه
وليكى عندى 2 قهوه باللبن كمان يا ستى
نورتينى

ســـهــــر يقول...

عايشه لنفسى

اكيد لازم هدوءءءءء مع الجو دة يا قمر
عشان الواحد يعرف بجد يستمتع
وميرسى ليكى نورتينى

ســـهــــر يقول...

Quite Sea
ميرسى يا قمر
وادعيلى يتحقق وتنورينى فيه زى منورتى المدونة كدة

ســـهــــر يقول...

غروببببببببب

ساره حبيبتى
ميرسى ع التاج وانك افتكرتينى يا قمر
واكيد طلباتك أوامر يا احلى سارة

ســـهــــر يقول...

marmar

ههههههههههه ايوة كدة يا مرمر
ميرسى يا حبيبتى وطبعا انتى وكل صحابك أصحاب مكان
نورتينى بجد

ســـهــــر يقول...

Sharm
انتى الاجمل وميرسى ليكى جدا
نورتى المدونة

ســـهــــر يقول...

saragebaly

سارة رفيقه التدوين ومن اول الناس اللى كنت بتابعها
تسلمى يا قمر ووعد اول ميتحقق هحجزلك مكان وابعتلك اقولك تشرفينى يا ساسو
وبلاش الغيبة دى بتوحشينى بجد

ســـهــــر يقول...

أع ـقل مـ ج ـنـونــة

يا مليون أهلا وسهلا بيكى بقا بس هه
نورتينى يا اعقل عاقلة فى عالم بلوجر كلة واكيد بأذن الله يدوم التواصل يا قمر

ســـهــــر يقول...

sabrina

اكييييييييد هتلاقى اللى بتحبية لو بصيتى على الافلام اللى بحبها هتلاقى نفس الفيلم حطاه يا قمر :$ شكلك هتبقى زبونتى وتشرفى انتى وصحبتك يا قمر
نورتينى

ســـهــــر يقول...

الشـوكة الــنـاعـمـة

جارى التنفيد يا قمر
ولا نقدر نرفضلك طلب وميرسى ليكى

ســـهــــر يقول...

re7ab.sale7

يا أأأألف مليون أهلا وسهلا ب أرق رحوبة فى الدنيا كلها
وحشااااااااانى أكتر يا رحاب ووحشتنى تعليقاتك يا قمر ومبسوطة انا اوى ان الفكرة عجبتك يا ست الكل
وهاتى احمد يا ستى وليكى عليا مش هشيل اسطوانات فيروز عشان خاطر عيونك وعيون أبو حيمد

وهو انا اطول انك تغنى بردو يا رحوووب
بس غنى بعد م الكافيه يشتهر يا رحاب عشان الزباين هههههههههه

بهزر معاكى يا توتة طبعا
وهضيفك حالا بالا ونحكى ونرغى كتير اد كدهون مع بعض

نورتينى يا قلبى

ســـهــــر يقول...

Tarkieb
لو ح تفتحي نادي اجتماعي بالمجان ممكن تعملى كدة ...لكن مشروع تجاري وتسمعي الناس فيروز بالعافية ....مين ح يجي ليكي....معظم من يدعى انه بيحب فيروز لا يجرؤ انه يقول مابحبهاش..عشان مايتقالش عليه جاهل..صدقيني مش مهم صوتها ايه لكن حاسس انها شويش بدون مشاعر بيغني وبقول سبحان الله لولا ان العرب كانو عايزين حد ينافس ام كلثوم ما كنا سمعنا عنها....الحمد لله اني ماعندك فلوس كنت عذبتينا بيها

اولا شرفت المدونة

ثانيا أفتح نادى بالمجان لية انا ؟
ثالثا لما يبقا مشروع تجارى بنفس الشكل اللى بخطط لية حضرتك مش هجبر حد يدخلة لان ببساطة هيكون بفلوسة مش منطقى انة يدخل مكان فيه حاجة مش عجباة ولا انت اية رأيك؟؟؟؟

رابعا مش فاهمه اية معنى معظم من يدعى حب فيروز ميقدرش يقول انة مش بيحبها
هو حد هيجبرة انة يقول بحبها ؟؟؟
لا طبعا كل واحد حر فى أختياراتة واللى يحب يسمعه
وصدقنى ام كلثوم حاجة وفيروز حاجة

وميرسى ليك شرفتنى

ســـهــــر يقول...

مدونة بحبك

ههههههههه اهو بردو يا قمر الواحد لازم يتابع ويشوف الدنيا ماشة ازاى
واخبار الكافيه هتبقا اكيد مختلفة هههههههههه
نورتينى وان شاء الله دايما منورة المدونة

ســـهــــر يقول...

شذا الروح

كله بيد الله طبعا يا قمر
وانتى وحشانى اكتر يا بنوته انتى فينك كدة غايبة لية

دايما منورانى يا ارق بنوتة

ســـهــــر يقول...

Bent Men ElZaman Da !!

يارب يسمع منك
ميرسى ليكى يا قمر نورتى المدونة

ســـهــــر يقول...

داليـ ـ ـ ـ ـ ـ ــــا

ههههههههه انتى سكر على فكرة
تتحرجى اية يا بنتى بس هو احنا فى بينا الكلام دة ؟
ميرسى على سؤالك يا حبيبتى
وانا كنت مسافره كدة شويتين ورجعت تانى
ويااااااريت يا دودى كنت احقق الحلم واجى افرحكم معايا
بس ان شاء الله يتحقق فى يوم

نورتينى يا احلى دودى

" يـ ألوناتك ! " يقول...

ان شاء الله
على فكرة فكرته كتير حلوة
ان شاء الله بجي بزوره اذا جيت مصر
لان اجواءه ما عاد في منها هالايام :)

♥♥ شذا ♥ الروح ♥♥ يقول...

وحشتينى اووووووووووووووووى

فين جديدك

منتظرين وبلاش الغياب كل ده
بحبك اوووووووووووووووووووووى

غير معرف يقول...

ايميل يجعلك من اصحاب الملايين

بقلم الدكتور محسن الصفار

جلس سعيد أمام جهاز الكمبيوتر اللذي اشتراه حديثا وتعرف للتو على عالم الانترنت الواسع , اخذ يقرا بريده الالكتروني وأخذ يتفحص الرسائل الواحدة تلو الأخرى حتى وصل إلى رسالة باللغة الانجليزية عنوانها (شخصي وسري للغاية) فتح سعيد الرسالة وقرأ نصها فكان مضمونه أن المرسل هو ابن لرئيس أفريقي سابق خلع من السلطة وأن والده أودع مبلغاً وقدره 100 مليون دولار في أحد البنوك وأن الأسرة لا تستطيع استخراج المبلغ إلا عن طريق حساب مصرفي لشخص ثالث ويعرض مرسل الرسالة على سعيد أن يعطيه 40% من المبلغ أي 40 مليون دولار فقط إن كان هو مستعداً لتقبل هذا المبلغ على حسابه الشخصي. لم يعر سعيد أهمية كبيرة للرسالة في باديء الأمر ولكن الفكرة في امتلاك 40 مليون دولار دون أي جهد بدأت تحلو له شيئاً فشيئاً واخذ الطمع يتغلغل في نفسه , أرسل سعيد رسالة رد إلى المرسل وسأله: - هل هنك من مخاطر في هذه العملية؟ جاء الرد بسرعة: - لا لا أبداً ليس هناك من مخاطر أبداً أبداً ولكنك يجب ان تحافظ على السرية الكاملة ضمانا لنجاح العملية . ردّ سعيد على الرسالة: - هل من مصاريف يجب أن أدفعها؟ جاءه الرد: - لا لا أبداً فنحن نتكفل بكل شيء أرجوك يا سيدي ساعدنا وستصبح أنت أيضاً من أصحاب الملايين. من أصحاب الملايين!! كم هي جميلة هذه الكلمة وأخذ سعيد يحلم بأنه يسكن قصراً ويركب أفخم السيارات ويمتلك طائرة خاصة وو...... وفجأة وجد سعيد نفسه وقد أرسل رسالة فيها رقم حسابه المصرفي واسم البنك، وبعد يومين جاءه بريد الكتروني مرفقة به رسالة عليها أختام حكومية تفيد بأن وزارة المالية في ذلك البلد الأفريقي لا تمانع من تحويل المبلغ إلى حساب سعيد.... باقى القصة و المزيد من مقالات الدكتور محسن الصفار الهادفة الخفيفة الظل موجودة بالرابط التالى

www.ouregypt.us

و لا يفوتك الذهاب لمقالات ثقافة الهزيمة وصفحة من الشرق و الغرب بنفس الرابط و فيها الكثير من المقالات الجيدة.

ســـهــــر يقول...

" يـ ألوناتك ! "
انتى الآحلى يا قمر
وان شاء الله تنورى مصر ويكون الكافيه أتعمل :)

ســـهــــر يقول...

شذا يا ؤوح قلب سهر انتى
انتى بتوحشينى اكتر ودايما وحشانى يا بنوتى

وبحبك أكتر ربنا ميحرمنى منك ابدا

Ahmed El_Desouky يقول...

عارفة

مع أني صيدلي

بس ده حلم حياتي برضه

مع اختلاف بعض التفاصيل

بس زي ما انتي قلتي كده
التكاليف
أنا محتاج تقريباً نفس التكاليف اللي هحتاجها لما آجي أجهز شقتي الي هتجوز فيها

ابقي ادعيلي معاكي بقى حلمي أنا كمان يتحقق

أول مرة أدخل مدونتك
ومعتقدش أنها هتكون آخر مرة :)

تحياتي