10:45 م

بحبك عشان انتى انتى !!!

بواسطه ســـهــــر



الجو بقا برد وانتى وانا لسة مشربناش قهوتنا فى الكافية بتاعنا من سنين
الشتا جة وانتى وانا لسة مأجلين مشاوير من 5 و 6 سنين
من يومين نزلت وسط البلد من غيرك
القهوة كانت عبقرية بس انتى كنتى حاجة فوق مستوى جودة القهوة تخيلى !!
لسعه البرد اللى حسيتها بعد الساعه 12 اول مفتكرت جملتلك اللى دايما تقوليهالى
حسيت بالدفا وكانت فى ابتسامة بلهاااااء على وشى
حبيبتى انتى كائن مع الوقت هيتلاشى
عاوزة اجرى انا وانتى على الكوبرى تانى ونغنى اغنية سميرة سعيد
عاوزة نرجع نشرب كابتشينو مالوش ريحة الطعم ويعجبنا
عاوزة نسافر مع بعض بالليل ونرجع واحنا خايفيين ومقتولين من الضحك
عاوزاكى تقوليلى حاجات قوليتهالى قبل كدة مليون مرة
واحرجك واقولك كرهت حواديتك
وتضحكى وانتى عارفة انى عمرى ممليت منك ولا عمرى همل منك
ولا هعرف فى يوم اضحك من قلبى غير معاكى
انا مرة اتمنيت انك تكونى مش حقيقية
يعنى اتمنيت ان انتى تكونى حاجة خرافية كدة مش بتحصل غير مرة واحدة فى العمر
وبتحصل لشخصية واحدة بس بردوا
واجى احكيها للناس ومتصدقنيش واتجنن انا بقا
نفسى اسافر عبر الزمن واشوف شكل علاقتى بيكى بعد سنييييين
هتبقا عاملة ازاى هنفضل صحاب اوى كدة ؟
ولا الدنيا هتاخدنا
بس افتكرت كلامك لما قولتيلى انا واثقة اننا لما نكبر اوى ولو عشنا مع بعض
هنوصل لحالة من الخرس يعنى مش هيبقا فى حاجة تتقال لاننا قولنا كل حاجة
ونسيت اقولك على فكرة معجبنيش الاحتمال دة خالص
انا عاوزة اشوفك لما تكبرى يا بنتى هتبقى شبة مين كدة ؟
شبه البت اللى حبيتها من سنين وبحب تفاصيلها
ولا هتبقى حد تانى هستغربة بس الآكيد هكون بحبة
من الاخر كدة انا بحبك اكتر مبحب الشتا والبرد
بحبك اكتر من القهوة المظبوطة الساعه 7 الصبح
بحبك اد السنين اللى فاتو واللى هييجو
بحبك زى منتى وبحب كل الجوابات اللى كتبتيهالى واللى لسة مكتبتيهاش
واللى ناوية تكتبيها واللى مش ناوية تكتبيها
بحبك أكتر من كل التواريخ اللى مدوننها فى كشاكيلنا
بحبك بطول وعرض كوبرى قصر النيل :)
بحبك أكتر من المشاوير اللى بيوصلها السوبر جيت :)
بحبك أكتر مبحب البخور اللى بالتفاح والفل والصندل
بحبك



20 شربوا معايا القهوه:

موناليزا يقول...

ربنا يديم الحب بينكم

مدونة رحلة حياه يقول...

السلام عليكم
على فكرة شكلك هتوحشينا قريب
حمدالله ع السلامة يا باشا
انا عندى ليكى اقتراح
ممكن تروحى تخطبيها وترجعى بالسرعة
هتلاقى مواصلات فى الوقت دا وبالمرة اشرب معم قهوة
خلى بالك منك يا عم وابقى طمنا عليك
سلام وبعدين نرجع

طالبة مقهورة ..درجة أولى يقول...

ياااااااه من امتى وانا مش باجي هنا

وةمن امتى وانا مش بزور حد لا بعلق عند حد

كأنهم ألف سنة..

الكافيه وحشني وصوت فيروز والكاكاو بتاع زمان :)


كل ده ملوش علاقة بالبوست
حسيت بدفا اوي فيه
تعرفي فيه نوع من الاشتياق اللي بحب
معظم الناس اشتياقها بيكون بألم مش بحب كده

محتاجة كوباية كاكاو اوي عشان سقعانة ممكن :)

أحــوال الهـوي يقول...

واحشتني القهوة و القعده عندك و اغاني فيروز الرائعه قلت اجي اسلم و اتمتع بقراءة كلماتك التي دائما تطربني

و بالفعل وجدت خاطرة جميلة لها رائحة و طعم و لون
رائحة البخور و القهوة المظبوطه و الذكريات العاطرة لسنوات مرت و اخري قادمة
و طعم الحب و الضحكات و لذة السعادة

و لون الامل و الخلود

سيدتي

تحدثتي فاصبتي و حركتي شجوني
و انا فعلا سعيد بقراري بزيارتك بعد طول انقطاع

من فضلك قهوة ع الريحه

تحياتي

توهة يقول...

جميله

محمود ناصف يقول...

رائعه كالعاده يا سهوره

بس عاوز اقلك حاجه الصداقه او اى علاقه مش السنين هيا اللى بتأثر فيها وتغيرها احنا وبس اللى بنجدد او بنغير او بنعدل علاقتنا ببعض انما السنين دى حيز زمانى بيستوعب افعالنا ومبيأثرش فيها لا بالسلب ولا بالايجاب

وسلاموز

Quite Sea يقول...

احسن حاجة ان الواحد يلاقي صديق يفهمه بجد ,, و بتكون الزكريات ما بينهم جامدة مووت ,
خصوصا لو كان صديق من الطفولة ,, خلاص بتكونوا وصلتوا ادرجة انه يفهمك من غير ما تتكلم ,, و بجد احسن اللحظات لما الواحد بيقضيها مع صحابة و كل اما العمر بيمر مبيقدرش يستغني عنة بتبقي كسبت اخ ...
مرحلة يعجز الكلام عن وصف ما بداخلك ..

عاشقة الليل يقول...

جامد جدا البوست ده
انا اتخيلت كل الكلام اللي مكتوب
مشيت معاكم وشميت ريحة القهوة
وحسيت بالبرد لاني انا كمان بحب الشتا جدا جدا
وقهوتكم مظبوطه قوي قوي
شكرا ع الاستضافة

أقدم عاصمه فى الحب يقول...

السلام عليكم

كل ده حب ..؟!
.
لهفه بطعم الحب
توليفه أجدتى عرضها علينا
.
.
سعدت هنا اليوم :)

سندباد يقول...

احسنتي
سعيد بمروري الاول
مدونة راقية حقا
تحياتي

Bent Men ElZaman Da !! يقول...

تحفه بجد
كلامك مش كلام الواحد يقرا وخلاص
بس كلام يتحس والواحد يتخيله ويعيشه
ربنا يديم الصداقه اللى بينكم :))

MONTY يقول...

انتى اصلك حته منى شئ بحبه غصب عنى لوافكرت ابعد وانسى يبقى روحى راحت منى... بحبك يا سهوره جدا وربنا يديم صداقتنا يارب قولى امييين يا بت هههههه

رائعه زى عادتك ودايما بحب كل كلمه من كلماتك

ربنا يسعدك

MONTY يقول...

انتى اصلك حتى منى شئ بحبه غصب عنى لوفكرت ابعد وانسى تبقى روحى راحت منى ...

ربنا يديم صداقتنا دايما يارب قولى اميييين يا بت ههههههه

رائعه زى عادتك

" يـ ألوناتك ! " يقول...

حلوة الصحبة لما تبقا بجد :)
الله يديم محبتكم :)

فدا

الجوكر يقول...

مدونه سكرها زياده

قهوتها بطعم الشهد

مودتى

NISREENA يقول...

ممممممممممم جميل أوي البوست ده بصراحة
يمكن لما قرأته من ست شهور محسيتش بيه أوي
انما دلوئتي حاساه جدا
ربنا يخليلك بنتك
ويخلي لكل عين رجاها

NISREENA يقول...
أزال المؤلف هذا التعليق.
re7ab.sale7 يقول...

مساء الورد
ياااااة من زمن مدخلتش مدونتك
من كتير اووي
من يوم ماقلتي انك ناوية علي كافية وتكون بس فيه اغاني فيروز
مممممم
كدة هرجع تاني عشان الكافية وحشني اتمشي فيه
اعرف التغرات
واعرف سبب الغياب

نيللى يقول...

مفيش أحلى من الصداقة ,الصداقة بمعنى الكلمة,الصداقة اللى يدعم كل منهما الأخر ,الصداقة اللى فيها كل واحد بيخاف على التانى,الصداقة اللى مفهاش انانية ..ربنا يديم الحب بينكم يارب

ع هامش انا بعش القهوه على فكره ..اسبرسو ومكايتو ولاتيه جداااااااا

Sherif Tahoon يقول...

لقد استمتعت بزيارتي.. و بالتأكيد لن تكون الأخيرة :))