Falling hearts Here
أنا سبت الشغل يا بلوجرية
وطبعا الشغل افتقدنى ومحتاسين من غيرى :)
ووزارة القوة العاملة ساقت عليا طوب الآرض
وأنا على صرخه واحدة مرجعلوش مرجعلوش
والله العظيم مش زعلانة ولا ندمانة أنا كان فضلى شوية وابقا شبة الناس
اللى كنت بأرف حتى ارمى عليهم السلام
الناس هناك بشعه اوى بيتكلمو على بعض وكلام مؤرف وزباله
بيدو زووووونب فى بعض وبعدها ياكلو ويشربو مع بعض
صحابى كتير من اللى اشتغلو قبلى قالولى دة عادى وموجود فى كل مكان
لكن انا أرفت اية اللى يجبرنى اتعامل مع ناس زى دى ؟
لا أنا عندى عيال بجرى عليهم ولا هموت من غير الشغل
يبقا بلاها وجع قلب وقله قيمة
اة دى قلة قيمة لما تضطر تتعامل مع ناس من جواك أرفان أوى منهم
دى واحدة يا ناس قاعده بتتكلم على زميلة ليها سابت الشغل من فترة
وقالت فيها اللى مفيش يهودى ممكن يقولة
واخر المتمة قالت
كرييييييييييييييه عينى اللى يخوض فى اعراض الناس
نيهاهاهاهاهاها
على اعتبار انى كائن شفاف لا بيشوف ولا بيسمع ولا كنت موجودة وهى عمالة تقسم مثلا
حاجة أخر مسخره بجد
انا متعرفتش ولا صاحبت هناك فى الشغل غير بنت واحدة
حبيتها اوى ولما مشينا مشينا مع بعض مع حزب احنا لا
بس لان احنا كنا فعلا تعبنا من المعاملة المؤرفة اللى محدش كان بيتعاملها
غيرى انا وهى وياما صهينا
بس وصلنا لمرحلة ان معدش ينفع نستنا
بس وصلنا لمرحلة ان معدش ينفع نستنا
اة وجودنا كان حارق دم ناس كتير اوى بس مش عشان احرق فى دمهم بوجودى
انى انساق للمستوى دة
قبل ممشى خدت كل حاجة تخصنى
فلاشتى حبيبتى والاندكس بتاعتى والقلم ابو جنية ونص
والقلم الرصاص ابو سنون والاستيكة
والسبرتاية والكنكة والولاعه وعلبة الكبريت الاحتياطى
ونسيت مجى :((
ياترا بيعملو فيه اية دلوقتى ؟
ياترا بيعملو فيه اية دلوقتى ؟
تلاقية هريينة شرب بيشربو فية سخن على ساقع
لحد مجالة حمه
وبعدين مش بيغسلوة اكيد دى العيال اللى هناك معفنة اوى
تلاقى ولا نقطة بريل شمها حتى
بس هجييييييييييييبة قبل مجيب مرتبى كمان امال ايه
انا سبت الشغل وبكررها مش زعلانة وبحمد ربنا انى طلعت منة بحاجة
طلعت منة بصحبتى اللى بحبها اوى
وربنا اكيد هيعوضنا خير ويرزقنا بشغل احسن منة
مع ناس أحسن
وبس خلاص
29 شربوا معايا القهوه:
سيبك .. شغل يفوت ولا حد يموت
اكيد هما الخسرانين ناس بتشتغل بضمير
امال هى هتخرب من شوية
المهم ودا اهم ما فى الامر انك رجعتى لينا من جديد تنورى والله افتقدتك برغم انى عارفه انى مقصره كتير
بس شكلى مبسوطه انى هعرف انك متواجده دايما لحين صدور اشعار اخر
ربنا يوفقك وتلاقى شغل احسن وفيه غلايه وبلاها السبرتايه هههههههههه
واوعى تسيبى المج بتاعك انتى عارفه اللي يفرط فى المج بتاعه يبقى زى اللي فرط فى اى حاجه تانيه
وعود احمد ومحمود وكل الاسماء الجميله
ونورتى من جديد فى سمائنا الصافيه حتى الأن
وحشتينى وحشتينى وحشتينى
اووووووووووووووووووووووووووووووى
ولا يهمك
سيبها على الله المهم تكونى راضيه عن نفسك
وربنا يعوضك خير يارب
ان شاء الله احنا معاكى اخواتك
ربنا يسعدك يارب ويوفقك حبيبتى
امووووووووووووواه
نور يا نور يا نور
وحشاااااااااااااااااااااااااااانى
من هنا لحد عندك رايح جاى
فينك يا نور بتغيبى عنى لية كدة؟
اة انا بعدت بس رجعت اهه
اوعى تغيبى تانى عنى كدة
وحشتينى بجد
ومتقلقيش يا بنتى هجيبة يعنى هجيبة
اللى يفرط فى مجة كانة فرط فى ساعته
هههههههههههههههههه
نورتينى والتدوين منور بيكى يا قمراية انتى
أنوووووووووووس حبيبه قلبى
وحشانى اكتر يا ملاك
ومش همنى والله الله جاب الله خد الله علية العوض
واكيد بكرة احلى واحسن واجمل كمان
وطول منتو معايا هحتاج اية تانى بقا قوليلى ؟
ربنا ميحرمنى منك يا ملاكى يا قمر
السلام عليكم
شكل موضوع النميمه وانعدام الاخلاق وقيل والقال ده موجود في كل الشغل الي فالدنيا
لان كنت فاكره ان الشركه الي انا فيها هي الي بس كده اتاري كلنا فالهوا سوا ربنا يستر علينا فين الاخلاق
ربنا يرزقك بشغل افضل
تقبلي مروري
سيبك ياشيخة... شغل ايه وبتاع ايه... الست ملهاش غير البيت وتربية العيال .. وش بيطلع لسانه... ههههههه..
بصي طالما انتي مش مرتاحة ومقتنعة بقرارك ده يبقي ده احسن قرار اخدتيه..
انا هموووت من الضحك علي "المج".. ههههههه... حلوة هتجيلو حمي دي... هههههه.. مشكلة..
ويلا شدي حيلك كده.. عاوزين نسمع خبر حلو.. انك اشتغلتي رئيسة مجلس ادارة كده ولا حاجة.. ويكون في مكان تحبيه.. ويكون فيه ناس يستحقو الاحترام...
تحياتي ياسهر
عقبالى
ولا يهمك ياجميل
شغل يفوت ولا حد يموت
انا كمان سبت الشغل لما حسيت ان الناس فاكرة انة بفلوسها ممكن تملك ناس تانين
وعلى رايك احنا مش عندنا عيال نجرى عليهم
تحياتى لشخصك الكريم وبجد سعيدة بزيارتك ليا وان شاء اللة يدوم التواصل
هههههههههههههههههههههه
هموت من الضوحك على منظرك شايفاكى وانتى زى البنت اللى فى الصورة
عارفاكى انا لما بتعملى مصيبة
بس انتى نسيتى تقولى انك كشفتى الناس القذرة دى
قدام بعضهم وعرفتيهم كل واحد بيعمل ايه من ورا التانى مع انهم عارفين ومطنشين
بس يكش يولع الشغل اللى يحرء دم البونى ادم هو يختى الواحد مننا ايه غير شوية مشاعر متكدسة فوق بعضها تشكل هيكل حساس ممنوع الاقتراب منه و التصوير
او حتى التهزيىء
وبعدين انتى بتكدبى ليه بقا ؟؟
بتقولى معندكيش عيال تشتغلى عشانهم
فى صانية كدة نسيتى مشمشوش؟؟؟؟؟؟
بموت فيكى يا امو لسان ونص انتى
مساءك فيروزى بطعم القهوة ولون البنفسج
القمرالباكي
فعلا الموضوع دة بقا كتير لدرجة ان الناس مبقتش تستغربة
حاجة تارف والله ازاى الناس بيجيلها عين تبص فى عيون بعض ؟
ربنا يعافينا
ونورتينى يا قمر
ابو على يا جن
معرفش لية قافشة معايا انك جن دى يا ابو على ههههههههههه
ربنا يسمع منك واشتغل كدة مع احمد عز بتاع الحديد مش الممثل
وبعدين المج بتاعى دة حتة منى دة كان هدية من طنط اللى مبحبهاش والله
ههههههههههههههه
نورتنى يا ابوعلى يا جن بردو
عاشقة الرومانسية
عقبالك اية يا بنوتة
تسيبى الشغل ؟
نصيحة مش تمشى غير لما تشوفى مكان تانى
لانى اليومين اللى قعدتهم زهقت فيهم
ونورتى يا توتة
أمرأه من ثلج
على رايك يا بنتى فعلا هما اشترونا ولا اية؟ ربنا الغنى عن دة شغل
ونورتى ويارب متكنش اخر زيارة
نيفين
وش مكسوف وحاطط وشة فى الارض
ههههههههههههههههه
اة يانى يا قفشانى انتى
يابنتى زهقت ياناس كنت هتشل من دى عالم
بس سيبك انتى والنبى وحشانى يابت
ولى لى وحشانى اكتر
ومتخافيش مشمش فى عينى
هههههههههههههههه...
وانا انا الواد الجن... ال لا يهدي ولا يون.. طالع ازن نازل ازن... مش فاكر باقي الاغنية الغريبة دي...
ماشي يستي قولي جن برحتك...
ولو عاوزة تشتغلي مع عزوز - انا كده ديما بدلعه اصله حبيبي - قوليلي ابعتك ليه ب كارت مني.. وربنا يستر بقي وميشغلكيش في الفرن... ههههههه..
لا بعد الشر عليكي...
سؤال رخم غتت رزل غلس: مين طنط ال مبتحبهاش؟؟؟ هه؟ هه؟ هه؟
السلام عليكم
طيب والله تعرفي ان فعلا قاعده من الشغل عشان مشاكل قد تؤدي الي القاعده النهائيه للابد
ولميت حاجاتي وانا ماشيه وخدت ماج كان جايلي هديه كنت بشرب فيه هناك بس من وحده صحبتي ياعيني علينا ياساسوو
ومن يومها مشربتش فيه هههههههههههه
عيناه بتفرج عليه
ههههههههههه
بردو الواد الجن
انا انا الود الجن اللى لايهدا ولا يون طالع ازن نازل ازن منا يومى غاوى مش عارفة اية كدة هههههههههههه
لا فرن يالهوى هيبقا عذاب دنيا واخره
هههههههه
بص يا سيدى بقا دة مج كانت طنط مراة عمى ادتهولى هدية ولانى مش بحبها
قولت اعذبة واخده معايا الشغل امرمط فية
لكن ادعى على ابنى واكرة اللى يقول امين
لما ييجى العيال يشربو فية سخن وساقع ويجيبولو حمى افرح مثلا لا طبعا
انا عندى مبدء بردك يا كبير ولا اية
تسلم يا متابعنى انت يا جن يا جن يا جن
يا قمر يا باكى يا منور انت
يابنتى احنا زى مقال الشاعر ابو على
ملناش غير قاعده البيت والجواز
ههههههههههههههه
مبسوطة بالتواصل لكن قوليى اخبار الماج اية ؟
الا كان لونة اية صحيح اصل موضوع اللون دة بيفرق معايا اوى
منورانى يا قمراية
الماج لونه احمر فاسود ياجميل لو عيزاه ميغلاش عليكي اه منا قاعده اهو فالبيت لما هتجنن واشد فالكام شعرايه
ويجيلي اذبهلال من كتر القعاد قدام الكمبيوتر بس اهو باذن الله هيبقي ليه فايده بمعرفه ناس حلوه زيكم
الله يا قمر احمر فى اسود هاتية بقا بما انى اهلاوية :)
ميرسى يا توتة كلك زوق والله
انا معاكى ان القاعدة تزهق بس بينى وبينك اكرم من قلة القيمة يا اختشى
هههههههه
والناس الحلوة انتى واحدة منهم يا قمراية ومبسوطة جدا بمعرفتك وطيارة
هحطك عندى فى القايمة
منورانى
ولا يهمك
بس اهم حاجة انك كسبتى صديقة حقيقية
وده لوحده كفاية
ربنا يوفقك دايما
بوست جميل ودمة خفيف والحمد لله انك مش محتاجة للشغل لان فعلا معظم اماكن الشغل بالشكل دة بس ميمنعش برضة ان فية اماكن كويسة المهم ان الواحد يبقى مرتاح وادام انتى مرتاحة خلاص بالدنيا والى فيها بلا شغل بلا وجع جماغ مفيش احلى من النوم والتلفزيون والنت والانتخة ههههههههههههه
بتمنالك انك تلاقى مكان شغل كويس تكونى مرتاحة فية او فى حل احسن كبرى جماغك واتجوزى واقعدى فى البيت ههههه
بهزر طبعا
تحياتى ليكى
السلام عليكِ
الحياة تجارب ودروس
الله يوفقك في خطوتك القادمة
صباح الورد الاول
بجد انا زعلت وفرحت ضحكت وكشرت بس كل كلامك صح صح مليون المية
متزعليش لان ده اختيارك وبارادتك ومتنسيش ان احنا في الشغل ياما بنشوف ومتفكرنيش اني انا المدرسة والحضانة اللي اشتغلت فيهم برغم حب الاولاد لي الناظر والمدير كانوا شايفين اني فتاة مدلله ومينفعش ادرس للولاد , المهم قررت اني مشتغلش وانتبه لدراستي وكمان اتفرغ للكتابة
بقولك ابقي شوفي اللي انا كتبته مؤخرا في مدونتي وانت هتفهمي اكتر لان الموضع اللي انا كتبته هيفيدك اكيييد
تحياتي يا قمر
اى شغل هتلاقى فيه نفس الحكايه
لو مفيش كلام على بعض
هيبقى فيه نفسنه
بس بما ان احنا بنات ومدلعين
فا انا دايما مقتنعه بحاجه
انك ادام مش مستريحه فى الشغل ماتستمريش فيه
عشان احنا مش مجبرين نشتغل اصلا
(جامده حته التحريض دى)
سيبك انتى
الواحد مايزعلش على الشغل شغله تفوت ولا حد يموت
صراحه انا زعلانه على المج
ازاى تسبيه هناك لوحده
مالكيش حق
ربنا يوفقك يا قمر وتلاقى شغل احسن واحسن
صدقيني أنتي الكسبانة..أنا رغم اني عاطل أغلب الوقت بس الفترات القليلة اللي اشتغلت فيها شفت كده ..يتكلموا على بعض اقذر كلام ونازلين هزار مع بعض بعديها
لأ أنا دمي بيفور بسرعة
أنا حاليا المفروض لسه بادي في جورنال وطبعا ما أدراكي الوسط الصحفي
اول موضوع عملته ضيعوه بتعمد وشكل الموضوع مش حيعمر وحرجع بيتنا تاني سريعا
تحياتي
يااااا بختك عقبالى هههههههههههههه
دة انتى مفروض تعملى بارتى
وهما اللى خسروكى يا سهورة يا بنتى
بس انتى بتسيبى مجك الصدوق بكل سهولة كدة أنا كله الا مجى
على جثتى انى افرط فى مجى أبداااا
تحياتى ليكى يا سكر
ولذوقك الفيروزى الجميل :)
صباحك مسك
هو إنت عندك حق يا ساسو فى إن الواحد بيقرف من الناس اللى بيتعامل معاهم فى الشغل بس أكيد الواحد منا بيستفيد من وجوده فى بيئه زى دى بصديق أو خبره والى جانب ده وبعيداً عن مسألة العيال وإنك ممكن متبقيش محتاجه الشغل من الجانب المادى الا إن الشغل فى حد ذاته قيمه والمفروض إن ده يكون السبب الرئيسى للعمل مش العائد المادى بس علشان بلدنا مفيهاش كرامه لبنى الإنسان فبقى هم الناس كله هو تجميع الفلوس ونورتى من تانى يا سهوره
إرسال تعليق