Falling hearts Here
حاسه ان الدنيا بترقص بيا
ممكن تقروة وتدعو ربنا عمركم متوصلو لدى حاله
حاله من الاكتئاب كفيلة انها تخلينى أخد شريط كامل من البنادول فى نص ساعه من كتر الصداع
ساعات أحب حاجات ميحبهاش غيرى
بس كان نفسى يقاسمنى ولو حاجة بسيطة لانى كائن بتأثر فيه جدا التفاصيل
مقدرش يحب ولا حاجة من اللى بحبها عشان كدة مقدرتش افتكرله موقف واحد اتشاركنا فيه
بقا حبى ليك حاجة تكسف بكدب وربنا يسامحنى
المهزلة الحقيقة انك تعرف تفاصيل حكايتك من الناس
وتتبع خطوط القهر النفسى من على شفايف كل اللى حواليك
ساعتها بس بتبقا كل العلاقة تحت بند حاجة تكسف وتوكس
صعب اعيش فى الدنيا ديا الا بيك
كنت بحب اصطبح بالآغنية دى وانا معاك
بس كنت دايما تزعل منى لما اقولك انى مأقلمه نفسى على الحياه لو سبنا بعض
مش قولتلك عمرك مفهمتنى
كنت عاوزنى اموت من بعدك ؟ مفيش حاجة بتفضل للأبد
وفينك أنا من غيرك أنا مش عاقل ولا مجنون
انا مطحوووووووووون والدنيا دى رحايا
برغم ان صورتك يابابا جمبى ألا أنى بتلاشى أنى ابصلك
لحد النهاردة مش قادره استوعب فكرة انك خلاص فارقت الدنيا
ومش هشوفك ولا نتخانق تانى ولما تعرف انى زعلانة اوى
تيجى تصالحنى وبكل حب تبوس ايديا وانا أعيط واقولك اسفه
مبحبش حد يشوف اى دموع فى عينيا علشان لا اصعب عليه ولا يزعل عليا
انا بحبك انتى بس تشوفينى وانا بعيط عارفة لية عشان بخاف تفتكرى انى شايلة اوى جوايا
وتبتدى تقلقى لدرجة انك تهملى ولادك وبيتك وتبتدىء حالات الاكتئاب الغير المتكافىء عشانى
بعيط قدامك عشان انا واثقه انك عارفة انى خلاص طالما عيطت يبقا انا كدة قررت انسف اى حد
خلقة ربنا وصلنى لمرحلة الحزن دى وقتها بتطمنى
بس الكلام دة فاكرة اخر مرة حصل امتا ؟
كان من حوالى 4 سنين تفتكرى بقا فى حد على وجة الارض يستاهل انى اخسرك عشانة
no way
أنا شارب سجارة بنى حاسس ان دماغى بتاكلنى
بداية المعركة بينى وبين أمى أول حاجة بتخطر على بالها
أنى مدمنة وبتضطر تتكلم من الجيران والأهل والحبايب وطنط عايدة فى الكويت :)
وبعد المحاولات الميؤس منها بيبتدى الصريخ والعويل
والبت اللى فضلالى ضـــــــــــــــــاعت
أن راح منك يا عين هيروح من قلبى فين ؟ دة القلب يحب مرة ميحبش مرتين
اول مرة كنت ازعل من الفنانة شادية بعد سماعى للأغنية دى
عشان اللى يحب مرة يحب تعستماشر مرة
بكره تشوف يا ناكر خيرى زمنى من زمن غيرى
افتكر انك شفت لحد معنيك جالها حول وانا ببقا فرحانة اوى
كل محس ان حد مختلف مش هتعوضة تانى
بس بزعل انك متعكنن وطالع عين اهلك ومش طايق نفسك وكاره حياتك ودنيتك
وبقول أحسن يستاهل يكش يولع ...
بنلف نلف نلف نلف والسنين بتلف تلف تلف
والآم بتزيد وجراح بتخف
كل حاجة ممكن تنتهى ألا قلقى عليك
كل مفتكر انك بتحتضر الآلام بتزيد
وكل مبتبقا جمبى الجراح فعلا بتخف
الف ليلة وليله قصه كل ليله
أحكى يا شهرزاد احكى لشهريار اشغليله ليله لطلوع النهار
فاكره الاغنية دى ؟ لما كنا بنسمعها يوميا ايام التدريب
فاكره ؟؟؟ فاكره لما مكنش معانا فلوس عشان ندخل نتفرج ع الشو
وتانى يوم جاتلنا دعوه ودخلنا اتفرجنا ومن كتر التناكة اللى كنا حاسين بيها مكلمناش بعض
فاكره الف ليله وليله بالليل كانت بتبقا عامله ازاى ؟
نهيتك منتهيتك والطبع فيك غالب وديل الكلب عمره ميتعدل ولو علقو فيه قالب
انتى عبيطة عشان فاكره انى عبيطة وياما حاولت اوصلك اوعى تستخفى بعقل حد
وياما اديتك فرصه تبقى بنى ادمة وتبطلى شغل العيال دة
أنا لحد النهاردة مقولتلكيش انى مقهورة منك لحد النهاردة مقولتلكيش انك جرحتينى اوى
فى الوقت اللى كنت حطاكى فية جوة عينيا وشيلاكى على راسى
للأسف يا عزيزتى مبقاش عندى قدرة انى اسامح ولا عندى وقت انى اشرح
لان ببساطة أعتبرت كل حاجة حصلتلى مرحلة وعدت وريمت عليها جاز وولعت فيها جوايا
جواااااااااااااايا عشان مرجعلهاش تانى
ملحوظة مش مهمة لآى حد
مبوصلش للمرحلة دى غير لما فعلا أكون مكتئبة وكارهه كل حاجة
وللأسف الشديد أنا الآيام دى فى أشد مراحل الآكتئاب اللى مرت عليا
69 شربوا معايا القهوه:
???????????????????
تشكيلي أبكي لك ..
ومين سمعك الظاهر الموجه القادمة ليست موجة حر بقدر ما هية موجة اكتئاب والفضفضة تريح الواحد كتير لما ما يلاقيش حد يسمعه أو يفهمه.
سلامُ عليكم
ساسوووو..اوقات الشخابيط بيكون جواها كلام كتير..بس انتي مشخبطيش انتي فضفضتي..
انا متضايقة علشانك جدا..كنت بمر بحالة زي ديه من اسبوع بس لما شغلت نفسي بالمذاكرة والامتحانات بدأت انسى..
انتي محتاجة حاجتين..كوباية نسكافيه أو كابتشينو ومعاها شوكولاته حجم عائلي وفيروز ....هتلاقي كل حاجة بقت كويسة :) ان شاء الله
ربنا يفك كربك يارب ويسعدك ويهنيكي
أم الخلود
مش عارفة بس انا والله متمناش انها تكون موجه خالص صدقينى أحساس بشع
وميرسى ليكى يا قمر
السلام عليكم
بكل أسف داخلة على نفس المرحلة من الاكتئاب
ندعي لبعض بقى
طالبه مقهورة
طيب هتصدقينى ان قولتلك انى فعلا كنت بكتب البوست وانا بشرب كابتشينو بالفانيليا كمان :(
متضيقيش نفسك يا بنوتة انا الحمد لله
بعرف افوق نفسى فى الوقت المناسب من الاكتئاب أدعيلى انتى بسى :(
وربنا يوفقك وزاكرى كويس عشان نفرح بيكى يا توتة
نورتى الدنيا كلها
طبعا اول سؤال عن الغيبه
قلت يمكن تكوني بتفتحي الكافية
طبعا بين السطور كلام كتيييييييييييييييير
لو حبيتي اطلع اللي انتي عايزة تقوليه ومخبياه
بس الطيب احسن
فيروز ملعلعه و مدونتك مفتوحه عندي طول الوقت و بتتكرر الاغاني
تحياتي
مش عارفه انا لمسني كل كلمة انتي كتباها يمكن لان انا عندي اكتئاب بشع بقاله شهور
طيب تعالي نحط اكتئابي علي اكتئاب ونخرج نروح اي حتي ؟؟
نكش نولع الدنيا من الاكتئاب ونعدي الاخرين بيه؟
صباح الفل يا سهوره
ومش هقولك حاجه ولا هعلق على اللى أنت كاتباه لنى عارف إنها حاله عابره وبتعديها بسرعه كالعاده
ساسو حببتى
اولا انا مش عايزاكى تضايقى نفسك وزى ما قلتى انك ولعتى فى كل حاجه جواكى عشان مترجعلهاش تانى وده شيئ حلو اوى
بس كويس انك كتبتى كل الا جواكى وخرجتيه
كمان حاجه صدقينى محدش فى الدنيا يستاهل انك تكتئبى عشانه
نفسى اقلك كلام كتير اوى
وبصى دى مرحله وهتعدى
هتعدى بإذن الله
كلنا بنمر بحالات من النوع ده وبتعدى
هتاخد وقتها وهتعدى
ربنا يكرمك ويعديها ع خير
حمدلله على سلامتك اولا :)
عارفه بالرغم احساسك بالاكتئاب بس أجمل شىء ان فى كل كلمة تعبير عند ده فيه برضة تعبير عن القوة وأهم حاجة لان لو الضعف تمكن من انسان مكتئب ح يدمرة
حاولى تغيري جو و تتفسحى و تروحى سينما و تتغدى بره و تشوفى اصحابك او اشغلى نفسك باى شىء لمدة اسبوعين بعدها ح تلاقى المرحلة الصعبه دى عدت و حتى لما تفكرى فى كل حاجة تانى ح يكون وقعها أقل
تحياتي
انا بامر بكل اللى انتى قلتيه ده او اغلبه
ولكن انا فضلت السكوووت
لان طولها زى عرضها مش هتفرق
ممممممممممممم
ازيك يا بتوته انتى وحشتينى خالص مالص اووووووووووووووووووووووووى
انا جايا احجز لانى راجعه من الشغل هلاكانه
هقرء بعد شويه لان دى نفس حالتى
فاصل ثم أواصل
الحقيقة
لم اعبأ بمقدمة التدوينة فلم ترهبني لأتركها دون قراءتها
يشهد الله انني سعدت جداً بقرأتها وبتلك الفضفة التي باح بها قلبك قبل قلمك وتلك اولا حالة صحية حتى وان كانت الفضفضة في شكل كتابة مثلما فعلتي هنا
كما أعجبني شكل التدوينة التي تذكرني برباعيات صلاح جاهين ولكل رباعية حكمة وفكرة من تجربة ذاتية
هناك بعض منها الحقيقة تأثرت به وأصابني مابين سطورها من مشاعر لم تكتب لكنها كانت واضحة وساطعة تكلمت نيابة عنك بالكثير والكثير
دائما وأبدا التجربة الانسانية ثرية بكل أبعادها لسنا دائماً على صواب ولسنا دائما على خطأ كذلك كل الأمر مع من حولنا
لايسعني في النهاية الا تحيتك على تلك التدوينة الأدبية كما احييكي على وقوفك أمام نفسك بكل تلك الصراحة والوضوح مع نفسك ومع الأخرين
تحياتي
حسن أرابيسك
البوست دى ماتطلعش غير من حد فعلا مكتئب جدا
ربنا معاكى
مدونتك جميله جدا .. متابع ان شاء الله :)
-----
مدونتى شخصيه ساخره
http://m-myzone.blogspot.com/
انا جيت
ممممممممممممممممم
بصراحه مش عارفه اقولك ايه
غير ازمه وهتعدى مش لوحدك اللى مريتى بكده انا كمان واكتر منك
قلبى معاكى
ربنا يفك كربنا احنا الاتنين يارب
كونى كما تحبى
وخليكى قويه
معلهش هى كده حال الدنيا
يوم ليك ويوم عليك
احبك فى الله
حبيبه قلبي الجميله سهر
وحشتيني أوي يا قمرايه
بجد احساسك جميل
ومدونتك كلها رقه
ولها رونق متميز جدا
وبجد انا بستمتع لما بقرالك يا أجمل ساسو
السلام عليكم ورحمه الله وبركاته
ازيك ياقمر منورانا من بعد غياب
كنت مشتاقه لمواضيعك بس الموضوع ده مالو غامق اوي كده
باذن الله بعد الفضفضه دي هتكون حالتك احسن وحزنك هيخف وترجعي لينا متفائله باحلامك وكتابتك
ربنا يسعد قلبك
بت
يالهوووووووووووى
البت اللى حيلتى ضاعت
ايه يابت اللى جالك على غفلة ده
دانتى عملتيلى تربنتينا خالص وهى مش ناقصاكى
وهى عاملة ايه دلوقت
بس ايه موضوع الادمان ده عجبنى مووت
اصلى بفكر انحرف
وادينى فى الهايف وانا احبك ياننس
نفسى من هذا المزنق اهدى الاغنية دى لكل شاب وكل فتاه واقولهم لا تنحرفو لو عمك سرق فلوسك بوس ايديه شعر ودقن
الاغنية هى
اكل العسل حلو بس النحل بيقرص شرب الحشيش مزاجة عالى والراجل اللى يجي ويكرس
واييييييييييييه
منك للى كلت دراع جوزها
سهر يا جميلة
حالة وهتعدى صدقينى
اسألينا كلناااا
ياما مرينا بحالات زى كده واقسى كمان
وردة لعيونك
الدنيا بترقص بينا كلنا والله
ساعات الواحد بيكتب كلام كتير ملهوش معنى المهم يفضفض باى حاجه عن اللى جواه
ربنا يسعد ايامك يارب
سعدت بمرورككثيرا ودوام التواصل ان شاء الله
اسمحلى لى باضافة تحديث مدونتك عندى للمتابعه وشكرا
تحياتى
"برغم ان صورتك يابابا جمبى ألا أنى بتلاشى أنى ابصلك
لحد النهاردة مش قادره استوعب فكرة انك خلاص فارقت الدنيا"
حسيتها اووووى فكره انك بتتلاشى تبصى للصوره
مش لانك مش عايزه تشوفيه
لكن عشان مش تحاولى تقنعى نفسك ان ده حصل فعلا
مش هاقولك غير ربنا يعديكى من حاله الاكتئاب دى على خير ومش تطول كتير
وبعدين الاكتئاب ده بقى سمه مميزه بين الكل
ربنا يهديلك الحال
فضفضى يا حبيبتى وقولى كل اللى جواكى
بس تأكدى ان كل حاجة بتاخد وقتها وبتخلص مهما طال الوقت ده
تمنياتى لك بالسعادة وراحة البال
ليله شتاء
وعليكم السلام ورحمه الله وبركاتة
ربنا يخرجك منها على خير يا قمر
ميرسى ليكى
أحــوال الهـوي
ياااااااه ياريت دة حلم وامنية العمر يا استاذى
والطيب أحسن طبعا :)
ميرسى ليك وشرف ليا ان مدونتى نالت اعجابك بجد ويارب يكون اختيار الاغانى عجبك
شرفتنى
هوبتي
هوبا يا قمراية منورانى
وسلامه قلبك من الاكتئاب يا حبيبتى
تعالى يا ستى نخرج انا معنديش اى مانع ايدى على كتفك
نورتى المدونة يا بيبو يا جميلة
محمود ناصف
صديقى الرائع جدا
ان شاء الله يا محمود كلة هيعدى
دى حاجة صحيه جدا
نورتنى يا حودة
داليا
حبيبه قلبى يا دودى متحرمش منك ابدا وانا مقتنعه ان محدش يستاهل ان الواحد يكتئب عشانة بس دى تقدرى تقولى عليها شوية تراكمات أدت للأكتئاب يا دودى
ومقدرش اكتئب يابنتى وانتى موجودة
ولا اية يا ست الكل ؟
شرفتينى يا اغلى دودو
Tears
الله يسلم قلبك يا جميلة
وعلى فكرة انتى خلتينى اقرا البوست تانى عشان الملحوظة اللى قولتى عليها
وفعلا حاجة حلوة جدا تصدقى بقا
وانا فعلا قررت انى أغير جو ووالله قريب جدا من اللى اقترحتية عليه
ميرسى ليكى يا جميلة نورتينى
عاشقه الرومانسيه
بعد الشر عليكى من الأكتئاب يا دودووو
بس حاولى تتكلمى مع حد قريب ليكى وان شاء الله تبقى كويسة
نورتينى
♥♥ شذا ♥ الروح ♥♥
انتى وحشاااااااانى أكتر يا قمر
وربنا يعينك يا حبيبتى وميرسى ليكى
انتى بجد حد جميل يتحب
وكلة بيعدى الحمد لله
شرفتينى جدا
حسن ارابيسك
أنا بجد مش عارفه أقولك اية
كلامك أكبر من اى تعليق علية حقيقى
والحمد لله ان المدونة والبوست برغم عدم ترتيبة عجبك
فعلا حياة الأنسان كلها عبارة عن مجموعه تجارب منها الناجح ومنها الغير
شرفتنى بجد ومبسوطة جدا بتشريفك ليا
Mado
أكيد أكتئاب يا مادو :)
واكيد هزور مدونتك ويدوم بينا التواصل شرفتنى
ساسو
انتى كمان وحشانى يا بنوتة جدا
والمدونة وصاحبتها تحت امرك يا توتة
شرفتينى
القمر الباكى
معلش يا دودو نكدت عليكم
وحشتينى جدا
وان شاء الله كله يبقا كويس
نورتى الدنيا كلها يا بنوتة
موجة
هههههههههههههههه
يا مكنونة
بصى انا من وقت م الكومنت بتاعك وصل وانا كل مقراة اموت على نفسى م الضحك
ربنا يخليكى ليا يا اجدع موجةةةة
وعاوزة الغنوة التانية اللى بحبهااااا
حجرين ع الشيشه :)
نورتى يا روح قلبى انتى
Ms Venus
فينوستى الرقيقه
ان شاء الله كل حاجة هتبقا كويسة يا قمراية ميرسى لتشريفك
الحب الجميل
اكيد طبعا بنمر بأكتر من كدة وهنمر بأكتر من كدة كمان والله المستعان
ويشرفنى ان حضرتك تضيفنى طبعا
وانا هضيفك عندى وان شاء الله يدوم التواصل بينا
شرفتنى
Bent Men ElZaman Da
انتى لمستى أكتر حاجة توجع على فكرة
الله يرحمه وفى الجنه برحمه الله ان شاء الله
وبكرة أكيد أجمل يا بنوتة
نورتينى والله
موناليزا
موناليزا الرقيقه جدا
منورانى يا قمر وكل حاجة مهما طالت بيجيلها وقت وتنتهى بأذن الله
شرفتينى جدااااااا
سهر
عالم النت ليس افتراضى وخيالى
انه عالم حقيقى لو وجد من يملك
فضيلة الصدق مثلك
احييك على هذه الفضفضة
واتمنى لك كل الخير
اسمعى نصيحة تييرز وان شاء الله
ازمة وتعدى
تحياتى
ساسو
كلنا بنمر بأكتأب معلش فتره وهتعدى
ربنا يفك همك ويرضيكى
حاولى تغير ى روتين حياتك وان شاء الله هتروقى
تحية لكى
من شدة جمال كلماتك وصلتينى لنفس درجة اكتئابك
لأنى حسيت الكلام اوى
برغم ان كلامك فيه الغاز شوية بالنسبه لى بس هو فعلا شكل ف حاجه مضايقه بس هو لازم كل واحد فينا يجى عليه فتره يحصله كده ولو محصلناش كده يبقى احنا مش بشر ولا طبيعين يبقى اكيد فينا حاجه غلط لو عشنا الدنيا كده ضحك وتهريج وخلاص وصدقينى فترة وتعدى وتروح ترجع تانى هو دا حال الدنيا ربنا يوفقك ياقمر ومدونتك رقيقه اوى وفيروز عاملة شغل عالى اوى
هتعدي يا ساسو
اللي له بداية له نهاية كل حاجة في دنيتنا بتعدي حتى الاكتئاب لما بيبجي بيبقى ضيف تقيل اوي بس بعدما بيمشي بنحس بطعم الحياة احلى بكتير من غيره
عليكي هوم وورك تشوفي الفيديو اللي في اخر بوست عندي وزيادة توكيد ادي لينك الفيديو عاليوتيوب : http://www.youtube.com/watch?v=pDGW8nbXv-s
روقي واتمنى تخرجي من الحالة دي قريب
مش لوحدك
كلنا بيعدى علينا الحاله دى
ونفس الشعور
قلبى معاكى حبيبتى
تقبلى مرورى
توتا
اول حاجة مواجهة الحقيقة
ثانياً : المقدرة على استيعاب هذه الحقيقة .
ثالثاً : المقدرة على تمالك النفس .
رابعاً : استبقاء الايمان بالقدرة على تجاوزها والعمل على ذلك .
اتمنى لك التوفيق ،،
فارس عبدالفتاح ... قومي عربي
ساسو
فينك
طال غيابك
ايييييييييه الغيبه دى
منتظراكى تطمنينى عليكى
sal
ميرسى يا حبيبتى على الكلام الحلو دة ربنا يكرمك والحمد لله على كل حال
نورتينى
فضفضه
الحمد لله يا بنوتة الدنيا ابتدت تتظبط
وربنا يكرمك وعلى فكرة وحشانى اوى
had-befham
يانهار ابيض ربنا يبعد عنك الآكتئاب يارب صدقنى صعب
وميرسى ليك كلك زوق نورت الدنيا
Malooka Yousef
انتى صح دوام الحال من المحال
وكل شىء بيد الله واكيد بيتغير مفيش حاجة بتخلد يا قمر
وفيروز أهم حاجة تكون عجبتك :)
نورتينى
ام الخلود
أسفة يا حبيبتى على التأخير :(
Lady E
أسفة أتأخرت عليكى يا قمر
والحمد لله كل شىء بقا فى تحسن يا قمر
ميرسى لسؤالك وربنا يكرمك يا جميلة نورتينى
أتنين حبيبين
اتمنى تكونى انتى كمان خرجتى من الحالة دى يا توتة وايامك كلها تكون حلوة ان شاء الله شرفتينى
فارس عبدالفتاح
متشكرة جدا على الكلام اللى فعلا لية تأثير كبير وربنا يكرمك ونورت المدونة
داليـ ـ ـ ـ ـ ـ ــــا
دودو يا حبيبة قلبى ربنا ميحرمنى منك ولا من سؤالك يا ارق داليا تسلميلى يا قمر اونا اهه يا جميلة وحشاااااااااانى اوى
لا اله الا الله
سهر بنت حوا وادم
مكتئبه يا ناااااااااس
صحيح ف ناس لما بنعرفها وتبعد بيسبيوا حاجات بتفاصيلها
كلنا ما نقابلها نفتكرهم
بس لا يقع ف ملك الله الا ما يريد
واي شيء يضيع من ايد الواحد شووووور مهواش نصيبه سواء حافظ عليه او حاول بكل طاقته او حتي محاولش بردو لو عمل الالالالي مكنش هيبقي بتاعه لانه اصلا مش بتاعه
طبعا انتي مش عارفه مين الرخم الل بيعلق ده الرخم ده هو انا
وليد الدوغري
مريت من هنا
عجبتني مدونتكِ كثير
فتحية شكر لهكذا جمال !
حاسه بيكى اوى
والله انا اكتر حد حاسس باللى كتبتيه بس بجد خفى ماتفضليش كده ها توقلى لنقطه مش هاتعرفى تخرجى منها
قلبى معاكى
بت يا سهر
انتى هترجعى ببوستاتك المهيسة ولا لاء
وهترجعى لنا تانى ولا لاء
ردى
واسالى
ومتزعلنيش منك
تعرفي يا سحر
انا مش عارف انا ليه بقالي كتير ما زرتش مدونتك يمكن عشان رمضان و انا كمان منقطع عن مدونتي
بس فعلا منت هازعل لو البوست ده فاتني
غريبه مش كده؟؟؟؟
لانه فضفضة ممزوجه بفلسفة علي شوية سخرية علي جرح يئن
خلطة لا يمكن يكون معاها الدنيا بترقص
لكنها كشفت عن شخصيتك الكثير ووضحت انك انسانه حساسه جدا و شخصية مركبه لكن في النهايه قوية
سحر اعتقد اني فهمت الكثير من بين السطور المبهمه و الالغاز المتعمده
و احببت حوارك مع بابا احسسته جدا لاني اب و احب ابنتي كما تفعلين و احس بالغموض ناحيتها ايضا و يبدو انك فسرتي بعض منه
عزيزتي لن اطيل عليك
تحياتي
انتى كمان يابت وحشانى
انا مش عارفه فى ايه
انتى باعده ليه عننا
اكيد فى حاجه احلا مننا واخدكى مننا
اقطع دراعى من هنهوه
ههههههههههه
اذا ماكان فى حاجه كده جميله ولذيذه وحلوه واخداكى مننا
هى ايه بقه الله اعلم
هفكر وابقه اقولك
ارجعى بقه يابت نورى المدونه من تانى بالبوستات
السلام عليكم ورحمه الله وبركاته
كل سنه وانتي طيبه
ازيك ياقمر فينك من زمان هو الغالبيه معتزل والا ايه
اظهري وباني هههه ابقي طمنينا عليكي
دومتي بخير
صار لكى فترة طويلة لا تكتبى
اتمنى ان تكونى بخير
حبيبتى
اخبارك ايه
يارب تكونى بخير
وايه الغيبه الطويله دى ياريت ترجعى وطمنى الناس اللى بتحبك عليكى
انا قلقانه من غيابك يارب تكونى يا حبيبتى
ياريت طمنينى عليكى
توتا
خلى عندك امل
ومتخليش حد يولك للدرجة دى ولا الحياة نفسها من غير الامل الانسان ممكن يموت من التشائم تفائلى وبصى للحياة من وجهة نظر عكس الى شايفها دلوقتى
كل سنة وانتى طيبة
salmo 3aleko
ربنا معاكي فعلا الإكتئاب شيءصعب
مدونة و الله جميلة جدا
شرفت بزيارتها
مرحله اكتئاب بشعه و عرفها لاني من حوالي 6 سنين مش عارفه اخرج منها نوهائي لا بالبنادول و لا بالمهدئات ولا ولا
...ربنا كريم حاولي تخرجي بسرعه بحب كلماتك و بقرأ لك كتير بس اول مره من فتره اعلق عندك
تحياتي يا صغيرتي
إرسال تعليق