Falling hearts Here
انا متغاظة اوى يا بشر
متغاظة ومفروسة وباكل فى نفسى
انا اتسرقت اة وربنا اتسرقت
حتت عيل ميكملش ال 7 سنين سرقنى
ماشية لا بيا ولا عليا فى امان الله وباكل لب
ابص الاقى حد دببببببببببببببب على ضهرى
يطلع عيل صغير بيقولى والنبى يا ابلة انا مكلتش من امبارح
ولا دوقت الاكل هاتى جنية اجيب سندوتش
انا كنت خلاص بتشحتف ع الواد
وقربت اخدة معايا ع البيت
قوووووووم اية مديلوش اللى فية النصيب وامشى لاء
اديتة كبشة لب اد كدة الاهى يتسممها البعيد
وبسالة على اهلة وازاى سيبينة كدة
وقطع فى قلبى اللى يتشك فى قلبة يارررررررررررررب
وحكالى حكاية ولا فيروز فى فيلم دهب
ان ابوة غفير مستنية بقالة ساعتين ومجاش
والنبى يا ابلة تكلمية قوليلة ياسر عايز يروح وجعان
طيب يا حبيبى باباك معاة موبايل
لا بس مع عم طلعت موبايل كلمية علية
وخدت من الواد الرقم
وفعلالالالالالالالالالالالالالالالالالالالالالالالالا
رد عليا حد والله وقولتلة انا معايا ياسر وهو مستنى بباة
قووووووووووووووووووووووووم اية الراجل يقولى طب ادينى ياسر
خد يا حبيبى كلم خد الموبايل الواد وكل شوية يبعد وانا اقول غلبااااااااااان
يمكن محروج منى ومرة واحدة يا خلق الواد اختفى فى غفلة منى وانا بجيب
كبشة لب تانية من الكيس
راح فين اختفااااا وابص مش لقياه
انا جالى صدمة رباعية وقفت بتاع ربع ساعه متنحه
هو اييييييييييييييية دة ؟ السرقة بقت علنى
واشمعنا انا يكنش الواد دة استهيفنى ؟
ولا قال دى معاها ربع ك لب بقا مش هيفرق معاها موبايل ؟
طيب مش صغير على انة يسرق دة
والله اعلم دى تمسيلية معمولة وصاحب الرقم اللى كلمتة معاة
ولا الواد اصلا حرامى صغير
معرفتش اعمل حاجة غير انى اطلع على فرع فودافون واسحب الشريحه
بس حاليا معايا الشريحه بس من غير موبايل
:(
انا مكسوفة من نفسى اوى ان حتت عيل ضحك عليا
هقول اية للناس ولصحابى ومعارفى ؟
هقولهم اية فى الحزب ؟
انا مقهوووووووووورة
خدوا بالكم واى حد يقابل حد اسمه ياسر ميأمنلوش
والواد دة طيب لما يكمل ال خمستاشر سنه هيكون مصيرة اية ؟
ماشاء الله مسجل خطر ؟
متغـــــــــــــــــــــــــــاظة أوى
32 شربوا معايا القهوه:
يا نهار؟
للدرجادى ؟
عيل صغير حرامى؟
يارب استر علينا يارب
عموما السرقه بقيت اشكال والوان خالى بالك
مش اى حد يقولك حاجه تصدقى ياعنى دى واحده كانت بتساعد ست انها تعدى الشارع وثبتتها هى واحد وخدوا كل المعاها معدش في امان اوعى حد يصعب عليكى
تحياتى
لا حول ولا قوة الا بالله
معلش يا حبيبتي ده يعلمك انك تحرصي
يا بنتي احمدي ربنا انه اخد الموبيل بس
انتي متعرفيش العيال الصغيرة دي مصايب سوداوالله بجد
بعد كدا ان شاء الله شيفاه ايه
قوليله ربنا يسهلك
اوعي يا توته بجد الناس بقيت وحشه اوي
خلي بالك من نفسك
ربنا ييسرلك الحال ويبعد عنك كل شر
مودتي
تعيشى وما تاخديش غيرها !! ما تلوميش نفسك اى حد مكانك كان عمل كدة . مش ذنبنا اننا بنى ادمين بنحس . هو المفروض كنتى عملتى ايه يعنى ؟!! ضربتيه . كله عند الله ما فيش حاجة بتروح .
تعيشي وتاخدي غيرها
هههههههههههه
انا اعرف ياسر علي فكره
مش الموبايل بتاعك من اللي هو
شبه التليفون ابو قرص ده
ياخرااااابى ياسهر
بقى انتى تتسرقى؟؟؟
ويوم ماتتسرقى تتسرقى من ياسر
طب انا قولت هتنقى واحد يسرقك يكون مثلا خبرة وكفاءة
زى مثلا مثلا عمك حمبوزو لاوى بوزو
ولا خالتك سنية جونح
اقولك
ربنا يعوض عليكى بقى
بصراحة بقى هى حاجة تغيظ والله
معليش بقى موبيل وراح
و الله مش بقى فى أمان خالص لياسر ولا حتى لغير ياسر المفروض اننا مش بتعاطف مع اى حد بسهولة كدا والله السرقة و التلاعب بمشاعر و عواطف الناس بقى اشكال والوان والله
مش تزعلى نفسك يا قمر فداكى الف موبيل المهم انك بخير
تحياتى
يويو
معلش ياحبيبتى فداكى
المهم انك بخير
ههههههههههههههههههههههه
تعيش و تاخدى غيرها
بلاش الطيبة اللى زيادة عن الزوم ديه
من كلامك شكلها عصابة يا حبيبتى
يالله خد الشر وراح
اعتبريه وقع فى المية و باظ فداكي
بس تعالى هنا
انتى اتعديتي منى و بقيتي مفروسة؟؟؟؟؟؟؟
هههههههههههههههههه
هاتي شوية لب
اللب بيقلل الفرسة شوية
:(بس بيتخن جدااااااااااا اسأليني أنا
هههههههههههههه
بس فكرة جديده اووى هههههههه
ربنا يعوض عليكى
بجد الشارع بقى يخوف لوشوفت واحد بيموت بتخاف تقرب منه علشان هيقولو عملت فيه ايه الشارع بقى حاجه قلق
مدونتك جميله اوى
دمت بكل خير
سلام
سهر
تعيشى وتخدى غيرها
كل ده عشان معطيشى الود الجنيه
وضحكتى عليه بشوية لب
هههههههههههههه
ربنا يستر بقا علينا
سلام
رومانسى مشاكس
هههههههههههههههههههههههههه
ده انطباعةى الاولانى اول ما شفت البوست منظر الصوره وانا ترقت اه وربنا اتسرقت تضحك
معلش تعيشى وتاخدى غيرها
هروح افهم بقى الحكايه واجى
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه حد يوقفنى
طب مكلمتيش المفتش كرومبو ليه ؟
بس انتى بجد دمك زى العسل
متخافيش الحزب واخد ع السرقه فمش هيتكلم
كله من طلعت
صدمه رباعيه
معلش
ههههههه معلش ربنا يعوض عليكى اتعملت معايا مرة بس مش بالشكل ده بصراحة هى كانت خمسين جنيه بس اللى اتسرقت منى الحمد لله
تعرفى المثل اللى بيقول
هم يبكى وهم يضحك
أهو الهم ده بقى يضحك وفى نفس الوقت يبكى
يضحك بالنسبه لدمك الخفيف فى حكايتك للموضوع
ويبكى فى سرقة الموبايل
طبعا أكيد الموبايل عاملك فراغ كبير
اسألينى أنا أصلى اتسرق منى الموبايل مرتين قبل كده
عموما ربنا يعوض عليك
وقولى حسبى الله ونعم الوكيل
لكن مش تدعى على الطفل لأنه مش ليه ذنب الذنب ذنب أهله اللى سايبينه كده
وليكى يا ستى موبايل هديه منى
هبعتهولك فى رساله
وصباح الفل عليكى
سلالالالالالالام بقى
السلام عليكم ورحمة الله وبركاته
أذيك ياسهر
متشكره ليكى قووى لمرورك الكريم لمدونتى وتعليقك فى البوست قبل الآخير
ههههههههههههه
ضحكتنى قوووى والله
ومعلهش ربنا يعوض عليكى
انا زيك موبايلى راح من شهرين
متزعليش سلمتك بالدنيا كلها
تقبلى تحياتى ومودتى
سلالالالالالالالالالالالامى
إيناس
معللللللللللش
تعيشى وتاخدى غيرها
اكيد ياسر هيخلى باله منه
متقلقيش يا حبيبتى
ههههههه
ههههههههههههههههههههه
تعيشي ومتخديش غيرها أبدا...
بس أصلا العيال الصغيرة مشـــكلة بجد
ملهمش حدود...ممكن اي حاجة تحصل..
يالهوي
انا كنت قربت اعيط عليه
معلش استعوضي ربنا بقى
حاجه تنقط جديده فيكي يابلدنا
حسبي الله ونعم الوكيل
معلش يابنتي
ههههههههه
يا فالحه
ربع كيلو لب
طبعا لازم يطمع فيكي
ههههههههه
الله يعوض عليكي
بس بجد ازاى ولد في السن ده وكده؟؟؟؟؟؟؟؟
ولسه ياما هنشوف
هههههههههههههههههههه
ههههههههههههه
اصبري ياساسو بس اصلي ماضحكتش من زمان وحاسه اني هايغمي عليا
فداكي الموبايل ياروح قلبي بس بطلي اكل لب في الشارع
ههههههههههههههههههه
هو لسه في حد طيب كده
؟؟؟؟؟؟؟؟؟
انا كنت مفكره روحي بس اللي ممكن يتضحك عليا
اصلي لو مكانك كنت عملت كده
السلام عليكم
زيارتي دي مش تصفح للمدونة أو قراءة لموضوع وتعليق عليه لا دي زيارة مختلفة جدا أنا يشرفني إني أدعو حضرتك للمشاركة والكتابة معانا في مجلة رؤية مصرية يمكن يحالفك الحظ وتكوني أحد أعضاء فريق التحرير
العدد الجديد الرابع يعني هيصد بعد بكرة يعني فجر السبت لو هتقدري تشاركينا ابعتي دلوقتي على بريد المجلة رسالة تأكيدية وجهزي مشاركتك وابعتها بردو على بريد المجلة بس بسرعة عشان العدد بنبدأ شغل فيه يوم الجمعة بعد العشاء .. منتظر الرد والمشاركة
ودمتي بود
لينك المجلة
http://roayahmg.blogspot.com/
بريد المجلة
ibrahemaladawy@gmail.com
رئيس التحرير
كاتب مصري
ينهااار
هى وصل لكدا
بقت السرقة بالشكل دا
حرام طفولة الولد دا
وحرام اللى بيحصل دا بجد
طيب انتى مش فاكرة الرقم اللى اتصلتى بية دا ممكن تجيبى معلومات عنه ولا تلاقية مسروق هو كمان
ربنا يصلح الحال و يعوضك خير
تقبلى مرورى
يا عينى عليكى معلش تعيشى وتاخدى غيرها
فداكى متشيليش فى نفسك
كلنا فى الهوا سوا
أنا اسفة جدا بس بجد مش قادرة امسك نفسى من الضحك..أصل تخيلتك وانتى واقفة ساعتها ومش مصدقة نفسك.
يالة ربنا يعوضك باللى أحسن منه,الموبايل مش ياسر.
و الحمد لله انها جت فى الموبايل مش فيكى.
السلام عليكم
إذيك يا سهر
مش معقوله تفضلى متغاظه كل ده بسبب الموبايل واللى حصلك
يا بنتى فكى مافيش حاجه مستهله صدقينى أنتى بالدنيا وما فيها
يعنى لو بعد الشر كان جره ليكى حاجه هتعرفى تجيبى موبايل وكده يعنى
خليكى أقوى يا بنتى
هههههههههه
ياريت أشوفك سعيده ومتألقة ياقمر
وطمنينى عليكى
أختك إيناس
السلام عليكم
دي يمكن اول زيارة للمدونه
الموقف ده مش جديد و زي ما كل الناس علقت ربنا يستر علينا
انشاء الله تجيبي موبيل جديد
و ده درس ليكي انك متكليش لب بعد كده و انت ماشيه في الشارع ههههههههههههههه
ههههههه يلاخيرها فى غيرها كلنا طيبين وحياتك
المدونة جميلة !!
شرفتى السيمفونيةوكان عندى ملحوظة صغيرة جداً ، ايناس مرضيتش تقول على اسم حبيبها منعاً للأحراج ممكن لأننا عارفينه ،...بس مش انا .
:)
تحياتى دائماً لك بالتوفيق وإلى الأمام
يسعد مساك
اول زيارة لمدونتك و الاقيكي اتسرقت
يا رب استرها معانا لا نخرج من النت و نلاقي حرامي عالباب
تعيشي و تفتكري يا سهر
دعوة للتواصل مع مدونتي
معلش يا ساسو متتغظيش يا بنتى كلنا لها
الشحاته والسرقه دلوقتى بقوا فن مش اى كلام والا زى ما احنا فاهمين زى زمان
لا ده الموضوع تطور اوى
ابقى خلى بالك بقى المره اللى جايه
وفداكى الموبيل يا قمر
يارب تقبلى زيارتى :)
انا اول مرة بصراحة اجيلك مدونة
والمروض كمان كنت ارد على البوست الاخير
بس انا اول ما قريت البوست ده كنت هفطس من الضحك ولحقونى الحمد لله
حتة خطة عبقرية والله
انا لوشفت الواد ده انا هدله جايزة مسدس صغير فى النصب الدولى واظرفه رصاصتين.
هههههههههه
السلام عليكم
ههههههههههههههههههههههههههههههههههههههههههههههههههههههههههههههههههههههههههههههههههههههه
صدقينى هاحكيها لكل اصحابى بس على فكرة بلاش تكلى لب تانى فى الشارع وتفى على الارض ههههههههههههههههههههههههه
بس بجد انتى زعلانه على ايه اللب ولا التلفون ولا على المقلب ولا على نفسك ولا على الطفل ولا على المجتمع ولا على ولا على الدنيا خلاص وزمن الطيبه خلاص
يايرت تتعلمى انا مفيش طيبه الزمن دا وكمان احمدى ربنا انها جت على الموبيل قولى الحمد لله دوقتى بيخدوا حاجات تانيه ممكن قلب كليه عين قرانيه حاجات ماتتعوضش
باى يالذ موقف سمعته
إرسال تعليق